Shillong, Nailur 07: U Nongialam ka BJP bad Myntri Sorkar Bah Sanbor Shullai hynne ka sngi Balang ula ong baka BJP kan nym weng noh na ka jingkyrshan ia ka sorkar Meghalaya Democratic Alliance (MDA) ba lamkhmat da ka NPP.
Kane ka jingkren une u MLA ka South Shillong kala jia ruh hadien ba u National Vice President ka BJP bad ba khmih ia ka Meghalaya Dr Chuba Ao, dang shen ula pynbna ba ka BJP kan sa shim rai ban weng noh ialade na ka sorkar MDA hapoh ka shibnai.
“Ka BJP kan ym weng satia na ka Sorkar bad kan pyndep ia ka samoi” ong u Bah Sanbor ha ka kyrwoh.
Une u Myntri Sorkar ula kyrshan ia ka jingpynsngew jong u General Secretary ka 19 South Shillong ba ka jingweng naka kynhun synrop ha kum kane ka por ka lah ban kyrtoh kylla namar ban leh ia kane ha kum kane ka por ka lah ban pynsngewthuh bakla ia ki paidbah haba ong “Kumno kan long lada ngi hap ban iatreilang pat bad kine kijuh ki paralok hadien u 2023”.
Une u Myntri ula kyntu ia baroh ki Nongialam ka BJP ba kin kiar na ka jingpynmih khubor kiba lah ban ktah ia ka jingiadei bad baroh ki paralok ba iadonlang ha ka MDA.
“Ngi la dei ban pynleit jingmut halor ki jingai jingmut jong u BL Santhosh National General Secretary Organisation uba la ai jingmut ia ngi ban pynleit jingmut eh ba kumno ngin ioh jingjop bun eh ha ka elekshon ban wan bad ban kyntiew ia ka bhah nongthep vote” ula ong.
Haba pynpaw ba ka BJP kala nang khlain bor ha Meghalaya, u Bah Sanbor ula ong ba ka Party kala buh thong ban kynjoh ia ka jingjop ba palat 10 ngut ki MLA ha kane ka kynti.
