Shillong, Nailur 07: Ka Sur Ki Nong Mawlai kala pynsngew ba ka kaiphod jingtohkit halor ka jingshah siat iap u Nongialam barim ka HNLC Bah Cheristerfield Thangkhiew, ka ban sa wanrah da ka Sorkar ha ka Dorbar Synrai ban sdang ha ka 9 tarik Nailur, ka dei ban pynhun ia ka Iing ka sem jong une u Rangbah bad ruh ia ki paidbah ka Bri u Hynniewtrep.
Kat kum ka kyrwoh jong ka Sur ki Nong Mawlai ba kynthup ia ka seng KSU, FKJGP bad HNYF, la ong ba ka jingpynshitom ia baroh ki briew ba donkti ha kaban shim ia ka jingim u Bah Cherist kan dei kaba pynhun ia ka Iing ka sem bad ia ki paidbah ka Bri u Hynniewtrep.
“Ka kaiphod ka dei sei madan ia ki briew kiba donkti ha ka jingdkhat jubor ia ka jingim u Bah Cherist bad ba dei ruh ban ai ka jingpynshitom kat kum ki kyndon pyniap briew ia ki Pulit ba don hatei ka jingjia kynthup ia kiba phah siat” ong ka kyrwoh.
“Ngim kwah shuh kum katei ka jingjia ba kan wan jia biang ha ïing jongno re jongno ha kaban shu shah dkhat jubor ia ka mynsiem ba kordor tang na ka daw ba ki shu suba. Kane kadei ka kam riewkhlaw, kumta man uwei pa uwei uba donkti u dei ban ngat haka jingshah pynsajia kam pher la kidei kiba don haka Aiñ bad kiba phong Uniform ruh namar haka Ri Synshar paidbah man uwei pa uwei u nongshong shnong u don ïaka hok kaba mar kumjuh” kala bynrap.
Kumban shu pynkynmaw ki pulit ka jylla ha ka 13 tarik u Nailar 2021 kila leit khynra iaka iingsah u Bah Cheristerfield Thangkhiew bad kynnoh ba u Bah Cherist ula iakhun pyrshah ia ka kynhun ki Pulit da ka tari da ka jingthmu ban phet krad bad ki Pulit kila hap ban siat ia u kum ka jingialeh markylliang.
U Bah Cheristerfield ula mynsaw na ka jingshah siat bad la kit mar mar ia u sha Hospital hynrei ynda poi ha Hospital, ki Doktor kila pynbna ba ula khlad lypa ha lynti.
U Director General of Police ka Jylla u R. Chandranathan ha katei ka por, ula iathuh ba ha ka jingkhynra ia ka Iingsah, ka kynhun ki Pulit kila ioh ban kurup ia kawei ka pistol 9mm, kawei ka tari, kawei ka laptop bad katto katne tylli ki mobile phone kiba pyndonkam da une u General Secretary barim ka HNLC.
Kumban shu pynkynmaw, u Bah Cheristerfield Thangkhiew u la wan ban pyndem wait ha u bnai Risaw 2018 hakhmat jong u Symbud Myntri Rangbah ka Jylla Bah Prestone Tynsong.
U Bah Cheristerfield ba la don 54 snem ka rta, ula don nyngkong eh ha ka kynhun kiengatiar Hynniewtrep Achik Liberation Council, hynrei hadien ba la pynkut noh ia katei ka seng, u la donbynta ha ka jingseng ia ka HNLC ha u snem 1997 bad u la long kum u General Secretary.
