Shillong Naitung 10: Ka Myntri Pla Tyngka ka Ri Nirmala Sitharaman kala plie paidbah ia ka Polo Commercial Complex kaba la ap khmih lynti la slem-kaba dei ruh ka dak ka jingsdang ka jingpynroi ia ki jingtei ba kongsan ha jaka sor ka Jylla, ha ka jingiadon ryngkat u Myntri Rangbah Conrad K Sangma.
Ia kane ka Complex la tei na ka Smart City Mission ha ka jaka kaba 1.7 Lak sq ft bad ha ka jinglut jingsep kaba kot T.100.33 Klur Tyngka. Kane ka complex ka ai jaka ia ki 109 tylli ki dukan, ki jaka bam ba kyrpang bad ki jaka ialehkai ne Gaming Zone, ka jaka na ka bynta ban buh ia ki 8 tylli ki jaka treikam bad ka jaka pynieng ia 86 tylli ki kali bad 50 tylli ki thuk thuk. Nangta kan don 5 tylli ki Lift, 12 tylli ki Escalator, 5 tylli ki jaka mih kyrkieh ne Emergency Exit, 110 tylli ki CCTV Camera bad ka BMS System.
Kan don ruh ia ka Roof Top Solar Panel, ka Rain Water Harvesting, ka Water and Sewage Treatment Plants.
La buh ia u mawnongrim ban tei ia kane ka complex ha ka 28 tarik u Risaw 2020 bad la pyndep pat hadien saw snem ha u Nohprah 2024.
U Myntri Rangbah u Conrad K. Sangma, ula pynpaw ia ka jingsngewnguh bad ai jingiaroh ia ka Myntri Pla Tyngka kaba la wan ban iuhkjat 3 sngi ha jylla Meghalaya bad ong ba kane kan long kaei kaei kaban sah jingkynmaw bad ula iaroh ruh ia ka jingiai bteng ban ai jingkyrshan ia ka thain shatei lam mihngi.
Ula ai jingiaroh ruh ba lyngba ka Special Assistance to States for Capital Investment (SASCII) scheme la lah ban wanrah ia ka jingkylla lyngba ki jingtei ia ki projek bapher bapher.
“Kiba bun ki surok, ki jingtei, ki jingtei kiba donnam kin ieng ha kylleng ka jylla Meghalaya bad kine kin urlong lyngba ka jingdon ka SASCI bad ngi la lah ban pyndonkam pura ia kane ka scheme, khublei shibun ia ka jingsbun ka jong phi Myntri ka Pla Tyngka” la ong Sangma.
Ula niew ia kane ka shopping complex kaba thymmai ba kadei ka jingsdang ia ka jingpynkylla dur ia ka Shillong. U Myntri Rangbah ula pynbna ia ka jingthmu ban tei sa ia ka Riverfront Beautification Project kaba T.35 Klur-kaba ka sdang iaid shakhmat ryngkat bad kiba bynta ki kam ialehkai, kam jngohkai bad ki sienjam ban tei ia ki jingtei ia ki jaka treikam.
Ula ong ruh, ba ka sorkar ka dang iakren ban pynduna ia ka jingkhapngiah ka nongbah da kaba pynkynriah noh ia ki bynta kiba kongsan sha ka New Shillong Township.
“Ia kane kane ka complex, shen yn sa khot tender ban pyniaid da ki riewshimet bad la khmih lynti ba kan long ka jaka pdeng naka bynta ban sengkam ki samla bad ka kam jngohkai. Kane ka projek kan dei ka jingpynkup bor ia ki kam khaii pateng bad ban tei ia ka ioh ka hok kaba iar” ula ong.
Ka jingwan iuhkjat ka Myntri Pla Tyngka kala sdang naduh ka 10 tarik bad kan leit phai ha ka 13 tarik hadien ki prokram bapher bapher kynthup ka jingiakren bad ki kynhun bapher.
Ha kane ka jingialang la iadonlang u Symbud Myntri Rangbah ka jylla u Bah Sniawbhalang Dhar uba khmih ruh ia ka kam Pynroi Sor, ka Myntri ka tnad ka Koit ka khiah ka Kong Ampareen Lyngdoh, u Chief Secretary ka jylla u Bah DP Wahlang, ki heh ophisar sorkar bad kiwei kiwei.
