Shillong, Naitung 09 : U Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka sngi Balang, ula pyntip ba ka kam ban pynkynriah ia ki dukan madan kala sdang mynta na Khyndailad, da ka jingthmu ban lah pyniaid beit iaid ryntih ia ki kali bad pynthikna ia ka iaid ka ieng ba kylluid ki paidbah.
Haba iakren bad ki nongthoh khubor, u Bah Sniawbha ula ong b aka Sorkar ka dang pynkhreh ruh ban shim rai halor ki parking lot, kiba la dep ithuh ha bun ki jaka kynthup ka jaka ba marjan ka Secretariat bad Motphran.
Kat kum ka jingong jong u, ka thong ka long ban lah pyniaid beit iaid ryntih ia ki kali bad ka iaid ka ieng ba kylluid ia ki paidbah.
Haba kylli,u Bah Sniawbha ula pyntip ba ka Sorkar kam shym la leh experiment ia ka jingpynieng kali hynrei kala pyntreikam da ka ain, da ka jingdon jong ka parking policy.
U iathuh ba bun ki parking lot la pyntrei mynta bad palat 1000 tylli ki kali la khmih lynti ba kin ioh jaka pynieng. Katto katne ki jaka pynieng kali la khmih lynti ba kin sa dep noh shen kynthup kawei kaba don marjan ka Secretariat, Motphran bad ha Iew Polo.
U pyntip ba ka Myntri pla tyngka ka Ri la khmih lynti ba kan plie ia ka Iew Polo lashai ka sngi ha ka por 3:30 baje janmiet.
