Shillong, Naitung 09 : U Nongialam ka NPP bad Symbud Myntri Rangbah Bah Sniawbhalang Dhar ula pyntip ba u Myntri Rangbah ka Jylla Conrad K Sangma, ula bthah ia baroh ki MLA ba kin shong bishar bad lum jingkhein ia ki kam pynroi hala ki jong ki jong ki constituency.
Ula jubab ia kane halor ka jingkylli ba iadei bad ka jingialang ba long hapdeng ki 22 ngut ki MLA ka Ri-lum Garo bad u Myntri Rangbah kaba long ha ka sngi Balang.
Watla u khlem leit iashimbynta ha ka jingialang, u Bah Sniawbha u iathuh ba ki MLA kila iakren halor ki kam pynroi ba kila pyntrei hala ki jong ki jong ki constituency.
U Bah Sniawbha ula iathuh ba u Myntri Rangbah ula bthah ia ki MLA ba kin shong bishar bad lum jingkhein ia ki kam pyntoi bala pyntrei ha ki constituency jong ki ha kine ki arsnem shiteng.
U pyntip ba kum kane ka jingialang bad ki MLA ka ri-lumJaintia ruh kan sa long bad ka dei ka ban dang pynbeit ia ka tarik.
Haba kylli halor ka jingbujli kam hapoh ka kynhun Myntri, u Bah Sniawbha ula pynpaw ba kane ka shong ha u Myntri Rangbah ka Jylla ba un shim ia ka rai.
