Shillong, Nailur 07: Ka Kynhun Anti Narcotics Task Force (ANTF) ka East Khasi Hills hynnin ka sngi ba-ar, kila ioh ban kem haduh 6 ngut ki nongkhaii droks ba kynthup ia lai ngut ki kynthei ha ka jingkhynra bala pynlong ha kylleng ki jaka jong ka Nongbah Shillong.
Kat kum ka jingpyntip u Superintendent of Police (City) Bah Vivek Syiem, ki Pulit ka ANTF lem bad ki Pulit ka Laitumkhrah hadien ka jingioh khubor ba thikna, kila pynlong ia ka jingtalasi kali ha ki thain Laitumkhrah bad kila ioh ban bat ia kawei ka Local Taxi ML05-K-4437 na Lower New Colony bad ioh kem ia 4 ngut ki briew ha ryngkat u droks.
Kine ki saw ngut ki kyrteng u Debojit Ghosh ba 28 snem, u Badonbok Marwein ba 28 snem, ka Ibapynhun Marwein ba 29 snem bad u Macdonald Khongmalai ba 26 snem.
Na ka met jong kine ki briew, ki Pulit ka ANTF kila ioh ban kurup haduh 13.54 gram u drok heroin, 153 tylli ki bitor rit, 3 tylli ki mobile phone bad ka Maruti Taxi ba ki pyndonkam.
Ha kajuh ka por, ka kynhun ka ANTF kala ioh bat ia kawei ka kynthei ba 32 snem kaba kyrteng ka Deepika Roy ha ki thain Laitumkhrah Main Road, kaba la ialam ia ki Pulit sha ka Iingsah jong ka Archana Roy ba 25 snem bad ioh kurup haduh 57.54 gram u heroin kawei ka mobile phone bad ka pisa ba T. 1,94,975.
Hadien kane, ka ANTF kala leit ban khynra ia ka iingsah ka Deepika ha Nongrimbah Laitumkhrah bad kila ioh ban kurup ia ki jingdeng ksiar ba 256.36 gram, u droks heroin ba 66.7 gram bad ka pisa ba T. 19,000.
Une u Heh Pulit ula pyntip ba u droks bala ioh ban kurup lang baroh u long 137.78 gram bad ka pisa T. 2,14,075.
Ki Pulit kila register case pyrshah ia kine ki hynriew ngut ha Laitumkhrah Police Station kat kum ki kyndon jong ka NDPS Act.