Sonitpur, Nailur 07: Ha ka jingkhynra kaba la long hynne ka sngi Balang, ki bor pulit ka Sonitpur district ka Assam kila ioh ban kurup ia shibun bah ki tiar siat ha kaba bun na ki, ki dei kiba ju pyndonkam ha ki jingialeh thma.
Ki pulit kila ioh kurup ia kine ki tiar siat kynthup ia ki tiar pynbthei napoh ka jaka shong shnong jong ki nongrep slasha kaba hap hapoh Sonitpur district ka Assam.Ki tyllong khubor ki iathuh ba ki trai jong kine ki tiar kila tep noh ia kine ki tiar harud jong ka wah Belsiri.
Kane ka jaka bala ioh kurup ka don hapoh ka jaka khlaw hajan ka jaka shong shnong jong ki nongrep slasha hapoh Kamengbari.Kine ki tiar bala ioh kurup ki kynthup ia shibun bah ki pistol, ki rifle bad shibun bah ki kuli nalor ki tiar pynbthei ba bunjait.
Ha kane ka jingkhynra la lamkhmat da u Additional Superintendent of Police ka Sonitpur, u Madhurima Das.Na ka liang ki pulit ki suba jur ba ka kynhun seng lehnoh ka lah ban donkti ha kaba buhrieh ia kine ki tiar iapom kynthup ia ki tiar pynbthei na ka bynta ban leh ia ki kam pyntriem hadien habud.
Ia mynta hi, ki pulit kim pat shym la pynpaw ka jingsuba ia kino kino ki briew halor kane ka jingioh kurup, hynrei ka jingtohkit halor kane ka bynta kala iaid shakhmat.
Ha kaba kum kane kajuh ka jingjia, ki pulit kila ioh ban kurup shibun bah ki tiar pynbthei napoh kawei ka shnong kaba hap hapoh Kamrup district.
Ki pulit kila ioh ban kurup haduh kumba 2800 tylli ki tiar pynbthei gelatin stick bad 1500 tylli ki electronic detonator napoh ka shnong Rani kaba hap hap Kamrup district.
Ia kine ki tiar la ioh ban kurup na kawei ka kali Bolero pickup hadien ba kila pynlong ka jingbuddien ha katei ka jaka.Ha kane ka jingjia ki pulit kila kem noh ia uwei u briew 32 snem rta ia uba la tip kyrteng kum u Jahrul Islam.
Katkum ki tyllong khubor, ki bor pulit kila lapdien ia u Jahrul ha ka jaka ap pahara katba u dang mih na ka shnong Rani ban leit sha Meghalaya ha ryngkat kine ki tiar pynbthei.
