Shillong, Nailur 07 :Ka seng Hynniewtrep Integrated Territorial Organization (HITO) kala byrngem ban mudui sha ka National Green Tribunal (NGT) lada ka Tnad Pulit kam register ia ka ejehar (FIR) pyrshah ia ki 18 tylli ki trok ba kit dewiong be-ain.
“Kan pynbor ia ngi ban leit mudui sha ka NGT lada ki Pulit ka Mawryngkeng kim register case ia ka ejahar ba ngi la mudui pyrshah ia ki 18 tylli ki trok kit dewiong be-ain ba ngi ioh kem” ong u Wanbun Dkhar, General Secretary ka HITO haba iakren bad ki nongthoh khubor hynne ka sngi balang.
Une u Nongialam ka HITO u pyntip ba ka seng ha ka jingkhynra trok kit dewiong be-ain, kala ioh ban bat haduh 18 tylli ki trok bad kane kala jia ruh hadien ba u Symbud Myntri Rangbah ka Jylla Bah Prestone Tynsong dang shenm ula ong ba ka Sorkar kan yn map ban leh eiei pyrshah ia ka kynhun ba khot ki “High Level” kiba donkti ha ka jingpyniaid ia ki trok kit dewiong beain ha Jylla.
U Bah Prestone ula kylli ruh ia ka kyrteng jong ki briew kiba don ha kane ka kynhun High Level khnang ba ka sorkar kan phah kem ia ki.
Haba kynthoh ia kane, u Bah Dkhar ula ong ba ka jingkem ia kine ki trok ka dei ka jubab ia ka Sorkar Meghalaya Democratic Alliance (MDA) ba ka jingtih bad jingkhaii beain ia u dewiong ka dang iai bteng hapoh ka Jylla.
“Ka dei ruh ka jubab baka “High Level” ka don bad jan baroh ki nongniah jong ki trok be-ain kila pyntip ba la shah ia ki ban iaid khlem ki kot ki sla hadien ka jingiaid lyngba ka “high Level”” ula ong.
Une u Nongialam ka HITO ula pyntip ba ka seng kala ujor ejahar hapoh ka Mawryngkeng Police Station pyrshah ia ki 18 tylli ki trok ba ioh bat da ka seng ba ki kit dewiong beain.
“Hynrei ngi la ioh ka phone call na Mawryngkneng Police Station ba ong ba kim lah satia ban register case ia ka ejehar namar ka jingpynbna bala pynmih da ka Tnad Mining & Geology. Namar kata, ki Pulit kim pat lah satia ban register ia ka ejahar” ula ong.
Haba kylli, une u Nongialam ula ong ba ka HITO kan sa nang pan jingpynshai na u Officer in Charge jong ka Mawryngkneng Police Station. “Lada ki pynslem ban leh eiei, ngi ruh ngin sa rai ia kaei kaba dei ban leh khnang ba kito kiba don bynta ha kine ki kam be-ain kin ym ioh iaid laitluid” ula ong.
