Assam | Phai khmat ka Congress ban iatehlok bad kiwei ki seng sha ka elekshon 2026

Guwahati, Naitung 7: U President ka Assam Pradesh Congress Committee (APCC) Gaurav Gogoi ha ka sngi u Blei u la pynkut noh ia ka khubor hamsaia ba ka Congress kan iakhun hi tang marwei ia ka Assembly election 2026, da kaba u la ong ba ka party kan iateh lok ne pre-poll alliance ha kane ka election.

Haba kren sha ki lad pathai khubor, u Gogoi u la ong ka Congress kala dep ban sdang ia ka jingiakren bad ki katto katne tylli ki party bad ka lynti ruh ka plie ban ioh ia kren bad kiwei pat.

“Ngi donkam ia ka jingiakren. Ka kam shakri paidbah bad ka sain pyrthei elekshon ki dei ki mat kiba pher. Haba mih ki rai ha ka sain pyrthei, ka Congress kan iakren bad baroh. Ha ki elekshon, ka Congress kan sngap ia baroh bad kan iakren bad baroh. Ngi la dep pynlong ia ka jingiakren bad ki katto katne ki nongialam seng sain pyrthei,” la ong u Gogoi.

Ka Assembly election sha ka iing dorbar thaw ain, mynta ka sah satang shi snem eiei bad baroh ki seng sain pyrthei kiba heh hapoh ka jylla Assam kila sei ia la ki buit ki bor ban ioh ia ka jingmyntoi.

Ha kajuh ka por, ka Assam United Citizens’ Convention la ïohi ïa ka jingïashim bynta na ki katto katne ki riew pawkhmat, kiba kynthup ïa u Yogendra Yadav bad u Hiren Gohain.