Tura, Nailaur 7 : Ki nongpang bad ki bahaiing bahasem jong ki, ki la ujor ba ka CHC ha Bhaitbari kala ieh ha ki doktor AYUSH ban sumar ia ki nongpang hadien ka jingphah leit hikai pyntbit ia arngut haduh shi taiew khlem da buh bujli da kiwei pat ban sumar sukher ia ki nongpang.
Ki paidbah ka Bhaitbari ha Rajabala ki la pyrshah tyngeh halor ka jingbym lah ki bor pyniaid ban buh beit da ki doktor kiba la tbit ha ka por ba ki arngut ki doktor ki hap ban leit pyntbit.
Ki la ujor ruh ba khyndai sngi mynshwa kawei ka longkmie armet ka la khlad noh ryngkat bad i khunlung hapoh kpoh hadien bala wanrah sha katei ka hospital.
Ha ka 6 tarik mynta u bnai ba u accountant jong ka Kazi and Zaman College la wan pynkit sha katei ka hospital na ka daw ba kiew ka blood pressure bad ba ioh stroke.
Na ka liang ki bahaiing ki la pynpaw ka jinglyngoh ba ym don satia ki doktor bad la hap ban sumar da u doktor AYUSH uba katkum ki kyndon sumar briew um dei satia u doktor MBBS ba la pyntbit ha ka kam.
Na ka liang u Medical Officer ka Bhaitbari hospital u la kubur ba ia utei u nongtrei college u Sofiur Islam la sumar da ki doktor Ayush bad ka nos kaba la pyntbit ha shwa ban phah pat ia u ban ioh jingsumar sha kiwei pat ki jaka sumar
Haba iadei pat bad ka jingiap jong ka longkmie ba armet ka Jebun Nessa 30 snem na Sidaknadi, u Medical Officer u la ong ba ka jingkhlad jong katei ka longkmie ka don ha ka taiew kaba 32 ba ka pun ia i khunlung.
La kubur ruh ba kadei ka jingshisha ba ym shym la don ki doktor ha katei ka hospital na ka bynta arsngi kata ha ka 5 bad 6 tarik mynta u bnai.
Ki doktor ba don ha katei ka CHC ba phah sha ka training ki kynthup ia u Dr. Pritom Das, sha Maternity and Child hospital, Tura naduh ka 29tarik Nailar haduh 7tarik Nailur katba ka Dr Bidanchi Marak naduh 05tarik haduh 10tarik Nailur mynta u bnai.
