Gangtok, Naitung 2: Ka Bharatiya Janata Party (BJP) Sikkim, kala pynrem jur ia u nongai ktien jong ka Indian National Congress u Dr. Ajay Kumar, uba la pynman ia ka Sikkim kum ka ri ba marjan.
Haba kdew ia kane ka jingkynthoh kum ka jingpyrshah ri ne anti-national, u nongai ktien jong ka BJP Sikkim u Passang Sherpa u la ong kane ka jingkynthoh kam shym la dei satia ba kum btuit u thylliej, hynrei ka dei ka jingpyrshang ban wanrah ia ka jingklumar hapoh ka thain khappud jong ka jylla, ka thain shatei lam mihngi.
“Kane kam shym la dei satia kaba shu jia ryngkhat hynrei kadei ka jingkynthoh bym don ia ka jingbah khlieh na u Dr. Ajay Kumar, uba la long teng u dkhot jong ka parliament (MP).Kane kadei ka jingpyrshang ban wanrah ia ka jingklumar hapoh ka dong ka thain,” ong u Sherpa.
Shuh shuh u la ong, kane kam dei ka sien ba nyngkong ba ki nongialam ka Congress kin kynthoh ia kum kine ki jait jingkynthoh. “Kham ha shwa u nongai buit jong ka Congress u Sam Pitroda u la pynia ryngkat ia ki paidbah jong ka thain shatei lam mihngi bad kiba ha China. Ia kum kine yn ym lah ban shu bret noh tang kum ka jingbakla u briew,” u la ong.
Haba pynpaw ba ka jylla Sikkim dang shen ka dang rakhe ia ka jingdap 50 snem ba wan ban pyniasoh bad ka India, ong u Sherpa ba kum kine ki jait jingkynthoh ka buh jingma ia ka jinglong trai ri. “Tang ka jingpan mab kam bat biang satia. Ka Indian National Congress kadei ban shim ia ki kyndon pynshitom ba tyngeh pyrshah ia u Dr. Ajay Kumar,” u la ong.
 Sikkim, kala pynrem jur ia u nongai ktien jong ka Indian National Congress u Dr. Ajay Kumar, uba la pynman ia ka Sikkim kum ka ri ba marjan.){kind=link}