Ka Sorkar kam lehbein iaki nongshong dukan madan | Ka jingpynkynriah kan long ka jingmyntoi ia ki : Tynsong

Pynbna u DyCM ia ka song T.10,000 ban kynriah bad ka jingkyrshan ba man u bnai

Shillong, Naitung02 : U Symbud Myntri Rangbah ba khmih ia ka kam Pohiing (Police) Bah Prestone Tynsong ula ban jur ba ka rai jong ka Sorkar ban pynkynriah ia ki nongshong dukan madan ha Khyndailad ka dei kaba la leh da ka jingthmu ban pynmyntoi iaki, ym ban lehbein ia ki.

Kat kum ka jingong jong u, ia kane ka kam la leh na ka bynta ka bha ka miat jong ki nongshong dukan madan bad ka Sorkar kala ai ia ki jingkyrshan ka ban iarap ia ka jinglut jingsep haba ki kynriah ia ki dukan sha ki jaka bala buh da ka Sorkar.

Haba iaken bad ki nongthoh khubor, u DyCM ula iathuh ba ki nongshong dukan madan kin ioh ia ka shifting allowance (jingpynlut haba kynriah ia ki dukan) ba T.10,000 bad ka song T.2000 shibnai na ka bynta san bnai kum ka jingiarap hadien ba kila kynriah sha ki jaka bala buh.

Ula pynpaw ia ka jinglyngngoh ba katto katne na ki nongshong dukan madan kila pynmih ia ka huri hura wat hapdeng ka jingpyrshang jong ka Sorkar ban kyrshan ia ki.

“Kam dei kaba ngi kwah ban leh bein ia ki nongshong dukan madan. Ha ka jingshisha ngi la leh na ka bynta ka jingbha jong ki. Phin nym iohi ia ki Sorkar kiba pyrkhat shisha halor ka bha ka miat ki nongshong dukan mdan. Ka jingsiew ba T.10,000 yn ai sha ki bad hadien ba kila dep kynriah sha ki jaka bala buh, kin sa ioh biang sa mar T.2000 manla u bnai haduh san bnai” ong u Bah Prestone.

Ha kajuh ka por, u DyCM ula batai ba ka Town Vending Committee, kaba kynthup iaki nongmihkhmat na ki nongshong dukan madan, kila iashimkhia lang halor ki plan ban pynkynriah bad kila dep iashong bun tylli ki jingialang ban iapynbeit ia kiei kiei baroh.
Ula kyntu ia ki nongshong dukan madan ba kin iatreilang bad ka Committee bad ban wanrah ia ki jingeh jong ki sha ka miet ban iakren.

Halor ka jingiakhih jong ki nongshong dukan madan, u Bah Prestone ula kyntu ia ki ba kin iapynbeit bad ka Committee, ia kaba u kular ba kan sa shimkhia ia ki jingeh ba ki iakynduh.

“Namar kata, nga shu kwah kyrpad ia baroh ki nongdie dukan madan ba kin iatreilang, wanrah ia baroh ki jingeh jong phi sha ka Committee bad ka Committee kan sa shimkhia ban leh eiei ia ki bad na ka liang ka Sorkar, ngim kwah satia ban shu kyndang beit beit ia ki” ong u Bah Prestone haba ban jur ba ka Sorkar ka sngewthuh ia ka kamai jakpoh jong ki nong die dukan madan bad kala kut jingmut ban kyrshan ia ki, haba bud pyrrkhing bha ruh ia ka Street Vendors (Protection of Livelihood and Regulation of Street Vending) Act bad ka Rules bala pyntreikam da ka Sorkar Jylla.