Shillong, Nailur 06: U Lat ka Jylla Satya Pal Malik ula ai ka jingmynjur ia ka Khasi Hills Autonomous District (Regulation and Administration of Land) Bill, 2021, kaban long ym tang ka stieh iada ia ka Khyndew ka Shyiap bad ka riti bat khyndew ha Ri-lum Khasi hynrei ban leh eiei ruh haba iadei bad ka jingbym don jaka jong ki trai paidriewlum jong ka thain.
Ia kane la pyntip da u Chief Executive Member (CEM) ka KHADC Bah Titosstarwell Chyne haba iakynduh bad ki lad pathai khubor hynne ka sngi ba-ar bad ong “Ngi da kmen shisha ban pyntip sha phi ba ka Bill kala ioh ia ka jingmynjur na u Lat ka Jylla”.
Haba pynpaw ba ka dei ka jingjop kaba khraw jong ka Executive Committee ba ialam da ka UDP ha KHADC, u Bah Titos ula ong ba ki EC bala leit noh watla kila pyrshang la bunsien hynrei kim shym la lah ban pynioh jingmynjur ia kane ka Bill na u Lat ka Jylla.
U Bah Titos ula ong ba ka Bill, mynta bala long Act, yn sa pynmih noh shen ha ka Meghalaya Gazette. “Hadien kane, ngin sa thaw ia ki Rule ban lah pyntreikam noh ia kane ka Ain hapoh u pud u sam jong ka KHADC” ula pyntip.
Ka KHAD (Regulation and Administration of Land) Bill, 2021 ka dei kaba la mynjur da ka Iingdorbar jong ka Khasi Hills Autonomous District Council (KHADC) ha ka 10 tarik Naiwieng jong u snem bala lah.
Shuwa kane, ka KHADC kala phah pynphai biang ia ka KHAD (Regulation and Administration of Land) Bill, 2020 bala mynjur ha u bnai Jylliew 2020 hadien ba la phah ia kane ka Bill sha ka Expert Committee bala thung da ka Sorkar Jylla ha une hi u snem.
Une u Khiehduh ka KHADC ula ong ba kane ka Bill kan pynkupbor ia ki Seng Kur, ki Dorbar Shnong bad ki Dorbar Raid ba kin ai ia ki dulir khyndew.
“Mynta ba kane ka Bill kala ioh ia ka jingmynjur na u Lat, ki dulir khyndew ba ai da ki Kur, ki Khlieh Nongsynshar bad da ka jingmynjur jong ka District Council, kin dei noh kiba la ithuh da ki Bank bad kiwei kiwei ki bor treikam” ula ong.
U Bah Titos ula ong ruh ba kane ka Bill kan iarap bha haba iadei bad ka jingtehlakam ia ka jingohdor ba palat liam haba leit shim ia ki dulir khyndew.
“Ka Bill kala kren shai ba baroh ka bai dulir pynskhem, ka jingpynithuh, ki dulir pata, ki No Objection Certificate kin long kat kum ka jingbuhdor jong ka Executive Committee na ka por sha ka por” ula ong.
Haba kylli, u Bah Titos ula ong baka Act kan iarap ruh ha ka ban leh eiei naka bynta kito ki trai paid riewlum ki bym don jaka puta.
“Ka Executive Committee ka lah ban pynbna ia ki jaka kum ki Land Bank khnang ba kan lah ban ai jaka ia ki trai paid riew lum ki bym don jaka” ula ong.
Ka Land Bill kala kren shai ruh baka Executive Committee da ka jingmynjur jong u Khlieh Nongsynshar bad ka Dorbar jong u, ka Dorbar Raid, Dorbar Shnong lane ki Trai jaka ne ki Kur, ki lah ban pynbna ne buh kyrpang ia kano kano ka jaka kum ka Land Bank. Kum ia kane ka jingpynbna dei ban pyntip sah ka District Council.
Ka jingpyniaid bad jingkhmih ia kine ki jaka bala pynbna kum ki Land Bank kan shong eh ha ka Committee ka ban thaw da ka Executive Committee ba kynthup ia u Executive Member ba khmih ia ka jaka puta, kala ong.
Ka la ong ruh ba ym lah satia ban pynkylla ia ka jaka raid sha ka Ri Kynti lane ban ai sha uno uno u briew u bym dei u trai paid riewlum ka Jylla.
