Shillong, Nailur 06: U MLA ka BJP na Shillong South ba dei ruh u Myntri ka tnad Veterinary ka sorkar jylla Bah Sanbor Shullai hynne u la ai ka jingiaroh ia ki nongialam ka All India Trinamool Congress na Mawsynram kiba la mih shakhmat ban wan pyniasoh noh sha ka BJP ban pynkhreh na bynta ka elekshon MLA ha katei ka constituency.
Ha ka jingkren bad ki lad pathai khubor hadien ba la wai ka jingialang sam ia ki khun sniang sha ki spah ngut ki nong Mawsynram kiba la pynioh lyngba ka skhim na ka tnad Animal Husbandary and Veterinary ha Mawsynram hi, u Bah Sanbor u la ong ba ka rai ba ki nongialam ka TMC ki shim kadei kaba paka tam eh.
“Nga ïohi ia ki paidbah Mawsynram ba ki la dep rung sha ka BJP namar ki ïohi ia ki kam pynroi ba ki wan beit na Delhi. Kan dei ruh ka burom ia ka Mawsynram lada u MLA jong ki Bah HM Shangpliang un donlang noh bad iakhun na ka BJP ha ka elekshon ban wan. Lada u pyniasoh sha ka BJP kumba leh manga ngin leit hi beit sha Delhi ban ioh kam ia ki kam pynroi,” u la ong.
U Bah Sanbor u ong ruh ba ha Mawsynram ka vote BJP ka bun bha namar u lap hi dalade ba watla u khlem leit ïalap elekshon ha ka por ba u iakhun ia ka elekshon MP hynrei u ioh pat haduh 4000 vote.
“Kane ka pyni ia ka dak kaba bha bad katno tam lada u Bah Shangpliang un wan ban pyniasoh noh bad ngi sha ka BJP.”
Shuh u la iathuh ruh ba shen kin sa pynduh pyndam noh ia ka mandal kaba rim bad thaw thymmai noh da kawei pat hadien ba ki nongialam ba phet na ka TMC ki la wan ban pyniasoh noh sha ka BJP.
U Bah Sanbor u ong ruh ba ki paidbah mynta kylleng ki jylla jong ka thain Northeast ki la dep phaikhmat lut sha ka BJP la ka long naduh ka jylla Assam, Manipur, Agartala, Nagaland bad Mizoram bad kiwei kiwei ki la noh lut sha ka BJP.
Utei u MLA ka BJP u ong ruh ba kim kwah shuh ban len namar ka pyrthei baroh ka la tip ba ka jingiakren hapdeng u Bah Shangpliang bad ka BJP ka la iaid bad mynta ka dei satang ka por.
Dang shen ki nongialam ba hakhmat jong u Bah Shangpliang MLA ka TMC ki la resain lut bad leit pyniasoh sha ka BJP.
