Nongstoiñ, Nailur 6: Ha ka lah sngi u Blei, katto katne ki puron na Assam kata u Ramkanta Das u ba ju tip kum u Ramkishan ki la leit ban ujor da ka ejahar ha Boko Police Station, da kaba kynnoh ba ha ka taiew ba la lah, haba ki la poi ha Nongstoiñ na ka bynta ban ring video їa ka jingrwai jong ki bad haba ki la їaid kylleng ki jaka na ka bynta ban ring dur, ki la don ki briew kiba la tur bad lute їa ki.
Ha katei ka ejahar la kynnoh ruh ba ha ka por 4.30 janmiet uwei u briew u ba kim ithuh, u la wan sha ki bad u la ong їa ki ba u kwah ban їalong paralok. Hynrei 15 minit shuwa ban kin pyndep їa ka jingring dur jong ki, utei u biew u la phet noh.
La kynnoh ruh ba hadien ki la dep ban ring dur bad ki la sdang ban leit phai noh sha shnong, utei u juh u briew ryngkat bad lai ngut kiwei pat ki la wan poi bad ki la knieh їa u shabi kali bad ka pisa Hynriew hajar tyngka.
Ki pulit ka Boko hadien ba ki la їoh pdiang їa katei ka ejahar ki la phah copy sha Nongstoiñ Police Station ha kaba ki pulit ka Nongstoiñ kin leh їa kaba don kam.
Hynrei haduh ba thoh їa kane ka khubor ym shym pat la їoh jingtip la ki pulit jong ka Nongstoiñ, ki la їoh kem ne em їano їano ha kaba їadei bad katei ka jingjia, hynrei la їoh jingtip pat ba ki la don katto katne ki khynnah Khasi na Nongstoiñ kiba la shah rah ha ki pulit sha thanad Nongstoiñ na ka bynta ban tohkit.
