Shillong Jylliew 26: Da ka jingshimkhia ban wanrah ia ka rukom synshar bad ban ialeh ban pynbha shuh shuh ia ka rukom ai jingshakri ka sorkar, u Myntri Rangbah ka jylla u Conrad K Sangma ha ka sngi Palei ula plie ia ki artylli ki Block Development Office ba dang shu tei thymmai ha Bhoirymbong bad ha Umling, Ri-Bhoi District.
Kine ki jingtei kiba thymmai ki long na ka btnta ban pynbha ia ka rukom ai jingshakri ha ki shnong ki thaw bad ban plie lad ia ki paidbah ha ki thain nongkyndong kiba don ha kylleng ka Meghala ban ioh da kaba suki a ka jingshakri jongka sorkar
U Myntri Rangbah ka Jylla u Conrad K. Sangma hynne ka sngi Palei, ula plie ia ki artylli ki Block Development Office kiba la tei thymmai kaba don ha Bhoirymbong bad Umling ha Ri-Bhoi District, kaba long ka sienjam ban pynkhlain ia ka jingai jingshakri ka sorkar ha ki shnong ki thaw bad ban pynbha ia ka jingai jingshakri ha ki thain nongkyndong jong ka jylla Meghalaya.
Ha ka por mynstep u Myntri Rangbah ula plie ia ka Bhoirymbong C&RD Block Complex, kaba la tei katkum kane ka juk kaba mynta kaba kot T.4.5 Klur ha ka jaka kaba don 1,930 square metre. Ia kaba la wan ban iadonlang u Myntri ka tnad Community & Rural Development u A.T. Mondal, u MLA ka Umroi u Bah Damanbaït Lamare, u MLA ka Mawhati Bah Charles Marngar, MLA ka Umsning u Dr Celestine Lyngdoh, u Secretary ka tnad C&RD u C.B. Sadhu bad kiwei kiwei ki heh ophisar.
Uwei na ki nongiakhun ia ka thma hapdeng ka India bad Pakistan ha u snem 1965 bad ha u snem 1971 u Bah Colbert Shadap ula khap ia u ribon kum ka jingplie ia katei ka ophis treikam.
Kane ka ophis treikam kaba thymmai kadei kaba don ia ka e-service counter, Training bad Conference Hall, ka jaka pyninam na ka bynta ki mar kiba la pynmih da ki Self-Help Group (SHG) bad ka Solar Power. La khmih lynti ba kan ai jingmyntoi ia 1.3 lak ngut ki paidbah ha ka Block, ha kaba yn pynbiang bad pynsuk ia ki jingai jingshakri kiba iadei bad ki kam jong ka sorkar.
Ha ka por mynsngi, u Myntri Rangbah ula plie ia ka Umling C&RD Block Complex ha kaba ia u ribon la khap da u Bah Rani Maring u nongtem uba pawnam bad u nongshna ia ki tiar tem tiar put. Kane ka projek kaba la sahteng naduh ba la tyrwa ha u snem 1980 bad la pyndep pat hadien jong ka 45 snem. La tei ha ka jinglut jingsep kaba kot T.5 Klur ha ka jaka kaba 2,050 square metre bad ka don ia ka Citizen Facilitation Centre, ki ophis treikam jong ki tnad bapher bapher bad ki jingtei kiba la shna pynbha na ka bynta 82 ngut ki nongtrei. Kan ai jingshakri ia ki 224 tylli ki shnong kiba hap hapoh jongka Block.
Ha kane ka jingialang la iadonlang u MLA ka Jirang u Bah Sosthenes Sohtun, ki ophisar jong ka C&RD bad ki nongshong shnong.
Haba kren ha baroh ar tylli ki jingialang, u Myntri Rangbah ula pynpaw ia ka jingiengskhem ka sorkar ban wanrah ia ka jingiajan hapdeng ki bor synshar ka sorkar bad ki paidbah. Ula ong ba palat ia ka T.2,500 Klur la dep ban bhah ha kine ki 7 snem kiba la dep na ka bynta ban tei pynbha ia ki ophis sorkar, ki skul bad Hospital ha kylleng ka jylla Meghalaya. Ula ong ba kine ki Block Office, watla kam ju don bha ka jingphaikhmat hynrei kidei pat kiba kongsan ban pyniaid beit ia ki kam jong ka sorkar bad ban ai ia ka jingshakri.
“Ha man la ka lynti kaba jngai ka sdang da ka jingshim ia ka shi kam. Lada ngim sdang, ngin ym lah ban poi sha ka jaka kaba ngi thmu ban leit” ula ong bad ka kdew ia ka jingshimkhia ka sorkar ban pyndep ia ka projek kaba la dawa la slem bha kum ka Umling complex.
U Myntri Rangbah ula pynbna ruh ia ka jingpyniaid shakhmat ia ki kam kiba iadei bad ka Digital bad ban pynkylla ia ki polisi treikam da ka jingthmu ban wanrah ia baroh ki tnad ha ka kyrdan jongka Block. Hapoh jong kine ki jingpynkylla, kiba bun ki aplikeshon, ki sertiphiket bad ki kam ai jingshakri na ka bynta ka bha ka miat, shen kin sa dei kiban ioh beit noh na ki Block Office, ban pynduna ia ka jingdonkam jong ki paidbah ban leit shaduh ki district headquarter.
Ula ong shuh shuh ba ka jingpynbha ia ki jingtei ha ki shnong ki thaw ka long kaba donkam ban lah ban pynurlong ia ka thong jong ka jylla ban kylla long ka jylla kaba kynjoh ia ka ioh ka kot kaba US $10 billion hapoh u snem 2028. Ki projek kiba kongsan ki kynthup kum ka jingpyniar ia ka Umroi Airport bad ia ka T.25,000 Klur ka Shillong–Guwahati Expressway kadei shi bynta jong katei ka jingiohi jngai, ia kaba la khmih lynti ba ka Ri-Bhoi kan long ka bynta kaba khraw na ka bynta ka jingkiew ka Meghalaya ha ka ioh ka kot.
U Myntri ka tnad Community & Rural Development u A.T. Mondal, haba kren ha kitei ki ar tylli ki jingialang, ula pyntip ia ki paidbah ba la bhah T.180 Klur na ka bynta ban kyntiew ia ki 46 tylli ki Block Office ha kylleng jong ka jylla. Ula banjur ba ka jingpynbha ia ki jingdonkam kan lam sha ka jingsted bad ka rukom ai jingshakri kaba janai ia ki paidbah.
Katba u MLA ka Jirang u Bah Sosthenes Sohtun ula pynpaw ia ka jingsngewnguh ia ka sorkar ban pynurlong ia ka jingdawa kaba la slem bha bad ula kyntu ia ki ophisar ba kin pyndonkam ha ka lynti kaba bha tam ia kine ki jingtei.
U MLA ka Umroi u Bah Damanbaït Lamare ryngkat bad kiwei pat ki MLA kila ai jingiaroh ia ka sorkar bad ula kyntu ban don ia ka jingai jingkyrshan ban pynkhlain ia ka jingai jingshakri ha ki thain nongkyndong.
Ka jingplie ia kine ki artylli ki Block Complex ka pyni ia ka sienjam kaba kongsan ha ka jingpyrshang ka jylla ban ai ia ka jingshakri sorkar sha ki paidbah, ban iohlad bha ha kaba iadei bad ki skhim, ki jingbuh ia ki jingthoh bad ki kam ai jingshakri kiba man la ka sngi hapoh ka Block.
