Shillong Nailur 06: Ka Jaintia Students Union, kala kynnoh ba u Myntri Rangbah ka Jylla Conrad Kongkal Sangma ula pyni ia ka jinglong arsap haba phai sha ka jingdawa pyntreikam ia ka Inner Line Permit (ILP) ha Jylla.
“Ngi pynrem jur ia ka jinglong arsap u Myntri Rangbah namar man ba u leit Delhi ban iakynduh ia u Myntri kam Pohiing ka Ri u Amit shah, um ju kren ne dawa ban pyntreikam noh ia ka ILP ha Jylla” ong u General Secretary ka GSU samla Treibor R Suchen.
Une u Nongialam Sengbhalang ula kynnoh ba kane ka jingleh u Myntri Rangbah ka pyni shai kdar ba um don mon satia ban pyntreikam ia ka ILP ha Jylla bad ba um suidniew ruh ia ka sur bad ka jingdawa u paidbah ka bri Hynniewtrep.
“Ngim lah ban pdiang ia ka jingleh u Myntri Rangbah bad ngi shim mynta ba ka jinghun tang bala mynjur ia ka resolution ha Iingdorbar Thaw Ain ka dei tang ban pynpjah ia ka jingiakhih ki kynhun Sengbhalang bad ki paidbah ka Bri u Hynniewtrep ha ki snem bala dep” ula ong.
U President ka JSU u samla Jersom Shylla u la ong, “Ka seng kan ym sngap jar ia kane ka jingleh kuman ka sorkar bad kan sa shong pyrkhat bad kiwei pat ki sengbhalang bad yn sa lum iaka jingialang bad ki nongsynshar shnong bad Elaka ha ryngkat u paidbah ban dawa jur ban pyntreikam iaka ILP hapoh ka jylla”.
