Shillong, Nailur 06: Ka Liang Pyrshah All India Trinamool Congress (AITC) hynne ka sngi ba-ar kala leit ban ujor sha ka Meghalaya Lokayukta ba kyrpad ban thung ia ka kynhun tohkit ba laitluid halor ka jingkynnoh thied kali bym shonghok bad ki jyrsieh hapoh ka Tnad Pulit.
Ia kane ka jingujor la soi da u National Spokesperson ka AITC Saket Gokhale uba la aiti ia ka sha u Chairperson ka Meghalaya Lokayukta Bah Bhalang Dhar.
Ha kane ka jingujor, u Gokhale ula ong “….dei ban don noh kyrkieh ia ka jingtohkit ba laitluid da ka Ophis jong phi (Lokayukta) halor ki kam bymhok bad ban leh eiei ruh pyrshah ia kito ki briew ba donkti ha kane ka kam jyrsieh”.
Ula ong ba ka rai ban wan buh da ka jingujor ka long namar baka Meghalaya Lokayukta kala pynpaw ha ki lad pathai khubor ba ka kloi ban pynlong ia ka jingtohkit halor kine ki jingkynnoh lada ka ioh pdiang ia ki jingujor namar kam don satia ka kyndon ha ka Lokayukta Act ba aibor ban tohkit hi khlem da ujor (suo-moto investigation).
Haba sot ia ka jingshem jong ka jingtohkit ka Enquiry Committee ki Pulit, u Gokhale ula ong “Haduh 29 tylli ki kali bala thied da ka Tnad Meghalaya Police ym shym la aiti sha kino kino ki Ophisar lane buh ha kaban pyndonkam da ka tnad Pulit. La shem ba ia kine ki kali la pyndonkam shimet da u AIG Bah GK Iangrai”.
Ula bynrap “Ki don ruh shibun ki jingtreikam bym hok ha kaba iadei bad ka jingai coupon umphniang ia kine ki kali thymmai ha kaba ia ka umphniang sorkar la pyndonkam ha ki kam shimet bad la shna thoh ruh ia ki caupon”.
Haba pynpaw ia ka jingsngewkhia, u Gokhale ula ong ‘Watla ka Enquiry Committee bala khlieh da u Addl Inspector General of Police (IGP) Mukesh Kumar Singh kala sei madan ia kine ki jingtreikam bym hok ha ka kaiphod sha u Director General of Police, Meghalaya, hynrei lyngngoh ba ym pat shym la leh eiei pyrshah ia u Bah Iangrai”.
