Shillong, Jylliew 24 : U Myntri Rangbah ka Jylla Conrad K Sangma ha ka sngi Ba-ar, ula pynpaw ba un sa leit hi dalade shimet ban iakynduh ia u Ambassador ka US ban iakren pynbeit halor ka jingbthah bala pynmih da ka Sorkar United States of America ba khein bym shngain ka Meghalaya ia ki nongshangkai pyrthei.
U Conrad ula niew ia kane ka jingbthah kum ka jingbthah kaba bakla shibun bad ong ba kala pynkup ia ka dur ka bym iahap ia ka Jylla.
Haba kren sha ki lad pathai khubor halor ka jingpynkhreh ia ka National Games 2027, u Myntri Rangbah ula ong “Ngan sa leit iakynduh ia u Ambassador ka US shen ban pynshai bad kyrpad ban pynkylla ia kane ka jingbthah.
“Ngan sa leit iakynduh ruh ia ka Ministry of External Affairs (MEA) bad ka Ministry of Home Affairs (MHA) ban pyntip ba kum kane ka jingbthah kala mih, kaba long ka kam ba bakla shibun” ong u Conrad.
Ula bynrap ba u don ka jingkyrmen ba ka jingbatai bad ka jingiatreilang bad ka MEA kan iarap ban pynbeit ia kane ka kam ia kaba u ong ba ka dei ka jingbthah kaba bakla palat.
U Conrad ula pynpaw ruh ia ka jingbym sngewtynnad halor ka jingiai bteng ban pynman ia ka Meghalaya kum ka jaka ka bym shngain. “Ka long kaba sngewsih ba haduh mynta, ki lad pathai khubor ki dang buh jingkylli halor ka jingshngain ka Jylla Meghalaya. Katto kala biang. Kum kine ki jingkylli ym dei shuh ban dang kylli. Ka Meghalaya ka dei ka jaka kaba shngain-ia kane la pynshisha khlem ka jingartatien” ula ong.
U Myntri Rangbah ula kyntu ia ki lad pathai khubor ba kin shim ia ka bynta kaba tei ha kaban iakhun pyrshah ia ki jingpyn man kiba ktah bad ban long ki nongiasaid ia ka Jylla bad ki nongshongshnong jong ka.
