Guwahati, Jylliew 21: U Himata Biswa Sarma u Myntri Rangbah ka jylla Assam, ha ka sngi Thohdieng u la pynpaw ia ka jingsngew syier halor ka jingkiew bad kharoi ha kaba iadei bad ki kam bapher bapher ha ki social media kiba dei nabar ri kiba ia shah ia ka Congress ha Assam, ha kaba u la khot bad ong ba kane ka mat kan buh hapdeng ka jingsngewkhia bad ka jingma na ka bynta ka ri.
U Sarma u la kynnoh ba ki don palat 5 hajr tylli ki social media accounts, ia kiba bun hi ki trei kam na ki ri Islamic kum na Bangladesh bad Pakistan, bad dang shen la sakhi ia ka jingpyntrei kam ban kyntiew ia u wei u nongialam jong ka Congress ha Assam bad kumjuh ruh ia ka Party State unit.
“Kine ki accounts kidei na ki 47 tylli ki ri jong ka pyrthei hynrei ki pyni ia ka jingsngewtynnad tang ia u wei u nongialam jong ka Congress hapoh ka jylla Assam bad kumjuh ruh ia Assam unit jong ka party,” ong u Sarma bad u khlem da jer kyrteng iano iano ki briew. Hynrei ia kane la sngewthuh ba ka thew beit sha u Gaurav Gogoi, uba la shimti kum u President jong ka Assam Pradesh Congress Committee (APCC) ha ka tiaw ba khatduh u bnai Jymmang.
Shuh shuh u Myntri Rangbah u la pynpaw ba kane ka rukom leh ka long kaba ipher bha. “Kine ki account bar ri kim shym la ia ia kren ne buh ia ka jong u Rahul Gandhi lane jong kiwei ki heh nongialam jong ka INC,” u la kdew.
U Sarma u la kynthoh shuh shuh ruh ba kine ki account kim da dei than tang ki jingthoh ha ka sain pyrthei, hynrei man ka por ki pyni ia ki jingthoh ia ha kaba iadei bad ka niam Islamic, ba kynthup ia ka jingkyrshan ia ka ia ka Palestine ne (pro-Palestine) ka jingkyrshan ia ka Iran, bad ia ka post ba kyrshan ia u Chief Advisor ka Bangldesh u Prof Md Yunus.
“Kane kadei ka sien ba nyngkong eh ba ngin iohi ia kum kine kiei kiei kila wan rung hapoh ka sain pyrthei ha ka jylla Assam bad khamtam eh ha shwa ban long ka Assembly election ha u snem 2026” la maham u Sarma.
Da kaba khot ia kine kiei kiei, kum ka sngewshyrkhei bad kaba sngew wit sngew klumar, u Sarma u la pyntikna ba ia kane ka mat la pyntip sha ka sorkar kmie bad kane ka thmu ruh ban pynthut ia ka election.
“Ka jinglong bad ka jingiatrei lang jong kine ki account ka kdew ne thew sha kaba heh bha ha ka mat sain pyrthei ba kynthup lang ruh ia ka niam, da ka jingthmu ban pynkhih win ia ka sain pyrthei hapoh ka jylla Assam” u la ong.
Na ka liang ki nongialam jong ka party Congress napoh Assam kam shym pat la ai kano kano ka jingkynthoh halor kane ka jingshah kynnoh.
