Shillong Jylliew 18: U President ka UDP u Bah Metbah Lyngdoh ha ka sngi Balang, ula ong ba ka Sorkar Jylla ka dang iai buddien khlem sangeh bad ka Sorkar Pdeng halor ka jingdawa ban pyntreikam noh ia ka Inner Line Permit (ILP) ha ka jylla.
Haba iakren bad ki nongthoh khubor, u Bah Metbah Lyngdoh ula pynkynmaw ba ka iingdorbar jong ki 60 ngut ki MLA da kawei ka jingmut kala mynjur ia ka Resolution halor katei ka mat bad la phah ruh ia ka sha ka Sorkar India ban ioh ia ka jingmynjur.
Ula ong ba u Myntri Rangbah bad ki Myntri Sorkar kila iai buddien bad shimkhia bad ka Sorkar Pdeng ban mynjur noh ia katei ka jingtyrwa haduh mynta.
U Bah Metbah ula ong ba ki don katto katne ki bynta kiba lah ban ia takhuh bad ki ain jong ka Sorkar Pdeng.
“Ia katei ka bynta donkam ban pynbeit noh lada jia ba ka don bad ia kaei kaba pynsangeh ia ka sorkar ban iaid shakhmat bad ka, nga ngeit skhem kin don ki mat ne ki jingeh kaba dei shi bynta jong ka kam kaba ka Sorkar Pdeng ka dang pyrshang ban khmih bha” ula ong.
Halor ka jingsahteng ban pyntreikam ia ka ILP, u President ka UDP ula ong, ba ka Meghalaya Residents, Safety and Security Act (MRSSA) ka lah ban iarap ha kaban shimkhia ia katei ka mat jong ka jingwan rung kyrthep ki briew kiba nabar shapoh ka jylla.
“Mynta ha kaba iadei bad ka MRSSA, ngam iohi eiei ba kan don kano kano ka jingbakla bad ka. Ki lah beit ban ioh ia katei kajuh ban peit ba kaei kaei ka rukom iaid bad ka rukom treikam kaba dei ban bud ryntih ha kaba iadei bad ka jingsngewkhia halor ka jingwan rung kyrthep ki briew kiba nabar, nga tharai kane kan iarap bha” ula ong shuh shuh.
 ha ka jylla.){kind=link}