Shillong, Jylliew 18 : Ka Iingkashari Meghalaya High Court ha ka sngi Balang, kala bthah ia ka National Highway Authority of India (NHAI), ba kan aiti ia ka kaiphod bala dep trei pynkhlain bad pynbha ia ka surok National Highway-6 ka Jowai-Ratacherra ba 102.255 km, hapoh ka 18 tarik Nailar.
Ha ka hukum bala pynmih hadien ba shong bishar ia ka PIL, ka Division Bench ba kynthup ia u Chief Justice IP Mukerji bad Justice W Diengdoh, kala ong “Haba khmih ia ki jubab bala ai bad haba shimkhia ruh ia ka jinglong ka suinbneng mynta, ngi la aipor ia ka NHAI haduh ka 18 tarik Nailar, 2025 ba kan ai ia ka kaiphod bala dep pyntrei ia ka kam”.
“La bthah ia u Amicus Curiae ban peitbha ia ka jingiaid ka kam bad ban air uh ia ka kaiphod ba long pyrshah, lada donkam, hapoh kane kajuh ka sngi” kala bynrap.
Ka jingshna pynkhlain bad pynbha ia kane ka surok kala sdang naduh ka 22 tarik Lber 2024 da ka NHAI, kaba la aiti ban pyntrei ia ka kam sha ki artylli ki kompani kataka Purvanchal Buildtech Pvt Ltd haba iadei bad ka surok ba 51 Km (Jowai haduh Wahiajer) bad ka Dhar Construction Company ba 51.255 km na Wahaijer haduh Ratacherra.
Ka Iingkashari kala buh jingthoh ruh ia ka kaiphod bala aiti da u Shoumen Senggupta, nongiasaid ka NHAI ba pyntip ba ia ka bynta ba 51Km, haduh 75 % ka kam kala dep bad ia ka bynta ba 51.255 Km, haduh 80% ka kam kala dep.
Une u nongiasaid ain ula ong ba namar ka jingthut jong ka suinbneng, ym shym la lah ban pyniaid shaid shaid ia ki kam kumba la kular ha ka por ba shong bishar khatduh ia kane ka kam. Ula pan por ban aiti ia ka kaiphod bala dep ban pyntrei ia ka kam.
, ba kan aiti ia ka kaiphod bala dep trei pynkhlain bad pynbha ia ka surok National Highway-6 ka Jowai-Ratacherra ba 102.255 km, hapoh ka 18 tarik Nailar.){kind=link}