Imphal, Jylliew 18: Ka khlam jingpang COVID-19 kala pur sted bha ha ki lai tylli ki district jong ka jylla Manipur, ha kaba phra ngut ki briew hadien ba test kila paw positive bad kane ka jingpur kane ka khlam mynta kala kiew sha 34 ngut ha baroh kawei ka jylla.
“Phra ngut ki briew kiba la ioh positive hadien ba la test kidei na Imphal West district, katba lai ngut la iathuh ki khubor ba kidei na Imphal East bad na Bishnupur districts,” ong u wei u ophisar.
Katkum ki ophisar, napdeng ki 34 tylli ki case, 22 ki dei na Imphal West, hynriew kidei na Imphal East, saw kidei na Bishnupur, bad mar u wei na Thoubal bad Kakching districts. Kine baroh san tylli ki district kidei kiba don ha ki jaka them jong ka thain Imphal.
Ha ka 9 tarik mynta u bnai Jylliew, kawei ka longkmie ba 23 snem ka rta kaba dei na Bishnupur district kala test bad long positive na ka jingpang COVID-19— kane ka dei ka sien ba nyngkong ba la lap ia kaba la mih khubor halor ka jingshah ktah hapoh ki jylla jong ka thain shatei lam mih ngi.
U Dr. Chambo Gonmei uba dei u Director ka Manipur Health Services u la ong, ba kane ka longkmie kadei na Bishnupur District kaba la ioh ia kine ki dak ki shin kum ka jingpang covid.
Ia ki ‘dak ki shin’ (sample) jong ka la test ha kawei ka jaka sumar shimet ha Imphal ha ka 5 tarik u bnai Jylliew, bad ka kaiphod ka la mih ha ka 9 tarik Jylliew, U la kyrpad ia ki paidbah ba kidei ban long kiba husiar na ka jingsaphriang sha kiwei pat ki bynta jong ka ri.
Ha kajuh ka por u Lat ka jylla Manipur uAjay Kumar Bhalla u la pyniaid ia ka jingialang review meeting halor ka Covid-19 ha ka sngi Nyngkong ha Raj Bhavan.
Ha kane ka jingialang la wan ban ia shim bynta lang da u Chief Secretary u Prashant Kumar Singh, kiwei de ki heh ophisar na ka tnad ka koit ka khiah bad kiwei de ki tnad trei kam.
