New Delhi, Nailur 06 : Ka liang pyrshah Congress kala thoh sha ka CBI ban dawa tohkit halor kumba hynniew tylli ki jingkynnoh kam bam sap pyrshah ia u Myntri Rangbah (CM) ka Assam u Himanta Biswa Sarma lem bad ka kurim jong u ka Riniki Bhuyan Sarma.
Ka Assam Congress kala phah ia ka memorandum sha kane ka tnat tohkit jong ka ri hadien ba kala pynlong ia ka jingiakhih hapoh Jantar Mantar ha ka nongbah ka ri.
Ki nongialam ba halor ka party congress na Assam kiba kynthup ia u heh ka PCC, u Bhupen Kumar Borah ruh kila pyniasoh ha kane ka jingiakhih.Nalor kata u heh ka AICC uba dei khmih ia ka Assam, u Jitendra Singh ruh ula wan iashim bynta lang ha kane ka prokram.
“Ki paralok ki jong nga na Assam kila dawa tohkit da ka CBI halor ki hynniew tylli ki jingkynnoh kam bamsap pyrshah ia u CM ka Assam u Himanta Biswa Sarma uba la ioh ia ka jingkyrkhu na ki nongialam ba hakhliehduh ka BJP, hynrei ki sakhi satar pyrshah ia u kilong kiba la thikna.Hato ka CBI kan ioh ia ka bor ban leh iala ka kamram,” ong u general secretary ka AICC, u Jairam Ramesh uba la pynlong ruh ka jingleit jurip ha katei ka prokram iakhih jong ka seng.
Ka memorandum bala phah sha ka CBI ka ong; “Ka Assam Pradesh Congress Committee ka kwah ban pyntip sha ka tnat tohkit ba hakhliehduh ka ri, ka sorkar India halor ki kam kiba kongsan, bad kyntu ruh ban shim mardor ia ki sienjam ban pynlong ia ka jingtohkit da ka CBI khnang ban lap ia ki jingshisha bad ban shim ka jingpynshitom pyrshah ia ki.”
Na ka liang ka Congress kala kynnoh ba ka skul Vandya International School kaba don ha Amingaon, North Guwahati, ka dei kaba la long trai da ka kurim u CM ka Assam ka Riniki Bhuyan Sarma kaba dang shen kala plie paidbah bad pynbna paidbah ba u nongseng ia kane ka skul u dei u myntri rangbah ka Assam.
“Hynrei kum u nongialam ba hakhliehduh ka jylla Assam, kumno u CM un lah ban pyniaid ia ka international school,” buh jingkylli ka Congress.
Ka mat kaba ar kaba kila rah kalong halor ka kompeni shimet, ka RBS Realtors ia kaba ka party kala kynnoh ba kala phah bun bah ka pisa sha kiba bun tylli ki karkhana bad kompeni kiba dei na ka longiing u CM ka Assam.
U director jong ka kompeni u Ashok Dhanuka u dei ruh uba la shah kynnoh donkti ha kaba iadei bad ka jingjia ka jingshah thied ki MLA ka Jharkhand. Ia ka rukom phah pisa da ka RBS Realtors na Kolkata dei ban pynlong ia ka jingtohkit da ka CBI, ong ka seng Congress
“Ka jingdawa kaba lai halor halor ka jingkynnoh bamsap lyngba ki kam jaka puta da kiba haiing hasem jong u CM, kata ha ka kam bamsap kaba heh tam lyngba ki die jaka puta hapoh 29 Bighas & 9 Lecha hapoh Assam, ha kaba la kynnoh ba u CM ruh u donkti lang.
Ka Congress kala kynnoh ruh ba kawei pat ka mat kaba khia kalong halor ka kam thok pyrshah ia ki nongthain jain kiba dei ki Assamese hapoh ki karkhana thain jain ryndia bad muka hapoh Assam.
Ka karkhana bala tip kum ka “Golden Thread Company” kala thied ia baroh ki jain ryndia bad muka ha ka dor kaba tad na ki nongthain ka jylla bad die pat ha ka dor kaba rem, kynnoh ka Congress.
Shuh shuh ka Congress kala dawa ruh ba pynlong ka jingtohkit halor ka jingthied ia ki PPE da ka sorkar Assam ha ka por ba ka jingpang Covid-19 ka dang saphriang bha, da kaba kynnoh ba kala don ka jingpynkhein ia baroh ki kyndon bala kdew.
