Delhi, Nailur 06 : U Anil Chauhan ia uba la tip kum u nongtuh kali ba shyrkhei tam ha India, kata ha kaba ula tuh haduh palat 5,000 tylli ki kali na ki bynta bapher bapher jong ka ri ula shah kem noh dang shen ha ki bor pulit ka Delhi.
Ki bor pulit ha ka sngi Nyngkong ba la lah kila ong hadien ba kila ioh ia ka jingtip kaba bniah, kumta ruh kila ioh ban kem noh ia u Chauhan 52 snem rta.La tip ia une u briew kum u nongialam jong ka kynhun runar kaba donkti ha kaba tuh ia ki hajar hajar tylli ki kali.U Chauhan ula shah pynmih kyrteng ruh halor palat 180 tylli ki jingjia shah tuh kali hapoh ka ri.
Hadien ka jingioh kem, ki pulit kila iathuh ba kila ioh ruh ban kurup ia kawei ka pistol shna hi ha ryngkat hynniew tylli ki kuli.Nalor kata kila ioh kurup ruh ia kawei ka thuk thuk bad ka kali kaba shu tuh.
Lah ban kdew ba ka shnong tynrai jong une u runar ka dei na Sonitpur district ka Assam bad ula sdang ia kane ka kam tuh kali naduh ka snem 1998.Ula don ruh ha ka rekod halor ka jingtuh ia palat 5000 tylli ki kali na ki bynta bapher bapher jong ka ri.
Une u briew ula shah kem la bun bunsien bad ula shah rai pynrem ruh san snem kynthih halor namar ka jingdonkti ha ka kam pyniap briew hapoh Nizamuddin police station.
Lah ruh ban kdew ba u Anil Chauhan u dei u Class-I kontraktor hapoh ka sorkar Assam.
