Agartala, Nailur 06 : Ka jingbujli ia ka durkhmat jong u Myntri Rangbah (CM) ha ka sorkar ba la lamkhmat da ka BJP ha Tripura kala pulom ban kyntiew ia ki rukom treikam jong ka sorkar jylla, ong u nongialam bala rim ka CPI-M u Manik Sarkar.
Lah ban kdew ba ki nongialam ka BJP napoh central ha u bnai Jymmang ba la dep kila pynbna ia ka kyrteng jong u Manik Saha ba un shimti ia ka kam CM ka Tripura na ka jaka jong u Diplab Deb.
“Kam shym la don satia kano kano ka jingkylla ha ka jingtreikam jong ka sorkar ha baroh ki liang wat hadien ka jingbujli ia ka durkhmat jong u CM,” ong u Manik Sarkar.
Nalor kata utei u nongialam bala rim ka CPI-M ka Tripura ula kam ruh ba ka jinglong jingman ha ki kam sain hima sima ha Tripura kala nang kham sniew shuh shuh wat hadien ka jingshimti da une u CM bathymmai ia ka sorkar synrop BJP-IPFT ha ka jylla.
Kumjuh ha ka sngi U Blei ba la lah, ka liang pyrshah CPI-M kala kynnoh ia ka sorkar synrop ka BJP ha Tripura halor ki kam thok kam shukor da kaba kam ba ki samla ka jylla kila ioh lad ban rung ha ki kam sorkar bad lyngba kiwei pat ki lad ioh kam ioh jam.
Shuh shuh ka CPI-M kala kynnoh ruh ba ka sorkar Tripura kala ialam bakla ia ki paidbah ka jylla hashwa ka jingpynlong ia ka ilekshon assembly ha une u snem u ban wan.
Na ka liang u nongialam bala rim ka CPI-M uba dei ruh u myntri pla tyngka barim ka Tripura, u Bhanu Lal Saha ula kam ba ha ka sorkar bala leit jong ka Left Front ha ka jylla, la lah ban thaw ia ki lad ai kam ai jam haba ia nujor bad kane ka sorkar synrop ba la lamkhmat da ka BJP.
