Shillong Nailur 05: U Member of Parliament (MP) jong ka Rajya Sabha u Dr WR Kharlukhi u la pynpaw ia ka jingbynniaw ba ym ju don satia ki ban kynmaw ia ki nonghikai shisien ba kila shongthait na ka kam la kadei ka sorkar ne wat ka imlang sahlang.
“Nga la long ialade kum u nonghikai la 33 snem, bad ki don da ki hajar ngut ki nonghikai ka Jylla ba ynda kila shongthait naka kam yn ym don shuh mano mano ruh kiban kynmaw ia ki, ym tang naka liang jong ka sorkar hynrei wat da ka imlang sahlang” ong une u MP.
Une u MP ka Rajya Sabha ula kren ia kane ha ka Mega Art & Dance Competition kaba la pynlong da ka NRE Pageant India Pvt Ltd ha Bangiya Sahitya Parisad, Jail Road.
“Hynrei nga ainguh ia u Blei namar ba dei lyngba ka jingkyrkhu ka jongu ba hadien ba ula shongthait naka kam hikai ula ioh ban long u MP” ong u Dr WR Kharlukhi.
Une u MP ula kular ba na ka liang ka jong u, un sa iakren ia ka Sorkar Jylla ba ka dei ban leh eiei noh na ka bynta ki nong hikai kiba la shongthait.
U Dr Kharlukhi u la ong, “Nga ngeit skhem ba nga long kumne kumba u long mynta kadei namar jong ki nonghikai kiba la hikai ia nga naduh na ka klas rit haduh skulbah bad kaei kaei ka jingjop kaba nga la iohmad haka jingim kadei namar jong ki nonghikai”.
Haba sdang ialap ruh ia ka elekshon 2023, une u Nongialam ka NPP ula pynpaw ia ka jingkyrmen ba u kyrtong ka Party u ban aireng na North Shillong Constituency Bah Ransom Sutnga, un ioh ia ka jingjop bad un buh jingkynmaw ruh ba un sa rah iakren ia kane ka mat kum u MLA lada u shah hied ha ki paidbah.
Haba phai sha ka Mega Art & Dance Competition, u Dr Kharlukhi ula ai khublei ia ki khynnah kiba la jop ha ki jingiakob bad u la kyntu ia kito ki bym shym la jop ba kin dang iai bteng ban trei shitom shuh shuh.
Ha kane ka jingialang la ioh ruh iaka jingkren na u Rangbah Shnong ka Jail Road u Prasenjit Dey, u Rangbah Shnong ka Mawkhar u Bah Arwan Tariang, u kyrtong ka NPP na North Shillong u Bah Ransom Sutnga uba ka kyrshan ia kane jingiakob, ka National Director jongka nre Pageant India Pvt Ld ka Kong Eldora Lyngdoh bad kiwei kiwei.
U Dr Kharlukhi ula sam ia ki khusnam sha ki nongjop ha ki jingiakob bad la pynkup burom ruh ia ki katto katne ngut ki nonghikai kum shi bynta jong ka jingrakhe ia ka Teachers Day.
