Shillong, Nailur 05: U Symbud Myntri Rangbah ka Jylla Bah Prestone Tynsong hynne ka sngi nyngkong, ula ong ba ka case jong u MDC ka BJP Bernard N Marak ka dei kaba iapher bak ly bak bad ka case jong u Assistant Inspector General of Police (A) Bah GK Iangrai.
U Bah Prestone ula kynthoh ia kane halor ka jingdawa jong ka BJP ban sospon (wengkam) noh mardor ia une u AIG namar ka jingkynnoh donkti ha ka jingpyndonkam bakla ia ki 29 tylli ki kali ka Tnad khnang ban plie lynti ia ka jingtohkit jong ka CBI ia kane ka kam.
Ka BJP kala kynnoh ba ka Sorkar kala iai pynkha thymmai ia ki jingkynnoh pyrshah ia u Bernard tang ban pynkut iaka kam sain pyrthei jong u hynrei kala klet pat ban wengkam ia u Heh Pulit uba pyndonkam bakla ia ka bor.
Haba kylli, u Bah Prestone ula ong “Ka case u Bernard ka dei kaba iapher bak ly bak bad ka case u Iangrai. Phi tip ba ka la don ka Inquiry Committee jong ka Tnad Pulit”.
“Haba iadei hi bad ka kam u Iangrai, to ngin ap shuwa ia ka kaiphod ba kan poi sha ka Sorkar bad ngin sa shim ia kaei kaba dei ban leh kat kum ba shah ka kam” ula kular.
U Bah Prestone ula ong “Kane kam dei ka kam bamsap lane ngam tip lehse ka lah ban dei tang ka jingpyndonkam bakla ia ki kali hynrei ngin ia ap shuwa ia ka kaiphod bad ngin sa shim ia ka sienjam ba donkam ban shim hadien ba ngi la ioh pdiang ia ka kaiphod”.
