Shillong, Nailur 05: U Symbud Myntri Rangbah ka Jylla Bah Prestone Tynsong hynne ka sngi nyngkong ula pyntip ba ka Sorkar Jylla kan sa khot ia ka jingialang bad baroh ki kynhun bapher bapher shisien bala dep thaw ia ki Regional Committee, ki ban pyntyllun shakhmat ia ka jingiakren pynbeit pud jong ka wat kaba ar.
Kane ka dei ka jingkular kaba la mih na u Symbud Myntri Rangbah ka Jylla hadien ka jingiakynduh ia ki Nongialam Shnong jong ka thain Block-I.
Haba iakren bad ki nongthoh khubor hadien ka jingialang, u Bah Prestone ula ong ba kane ka kynhun na Block-I kala aiti ia ka dorkhas ba kyrpad ia ka Sorkar ban pynthikna ba 36 tylli ki Shnong Pnar na Block-I, kin wan phai biang sha Meghalaya.
“Nga la batai ia ngi ba kin ap haduh da dep thaw ia ki Regional Committee bad hadien kane, ngin sa khot ia ka jingialang bad ki kynhun bapher bapher ban iasyllok halor ki kot ki sla kiba don” ula ong.
Haba kylli, u Bah Prestone ula ong ba u Myntri Rangbah ka Jylla Meghalaya bad Assam kila dep iarai ban thaw ia ki Regional Committee hapoh ka 15 sngi. “Namar kata, ka shong ha ki ba lano kin pynbna paidbah ia ka jingthaw ia kine ki Regional Committee” ula bynrap.
Dang shen, u General Secretary ka Labang Nongphyllut, Pangam Ralang Council ma Marcus M Thaiong ula ong ba haduh 36 tyllu ki Shnong Pnar kiba don ha Block-I kila shah pynhap jubor sha Karbi Anglong, Mikor bad North Cachan Hills ha u snem 1951. Kine ki Shnong ha ka jingshisha ki dei shibynta jong ka Ri-lum Jaintia.
“Namar kane, ngi la wan iakynduh ia u Symbud Myntri Rangbah ba un tuklar lang bad ban pynthikna ba baroh kine ki Shnong ki dei ban wanphai biang sha Meghalaya ha ka jingiakren pynbeit pud jong ka wat ba-ar hapdeng ka Meghalaya bad Assam” ula ong.
“Ngi ngeit skhem b aka Assam kan pyllait ia baroh kine ki shnong Pnar ba kin wan phai sha Jaintia Hills District” ong u Bah Thaiang.
Ula pynpaw ruh ia ka jingkyrmen ba ka Sorkar MDA hapoh ka jingialam jong u Conrad K Sangma kan lah ban pynbeit noh ia kane ka kam khappud kumba la angnud da ki paidbah khappud la slem bha.
