Shillong, Nailur 05: U National Vice President ka National People’s Party (NPP) bad Symbud Myntri Rangbah ka Jylla Bah Prestone Tynsong hynne ka sngi Nyngkong, u la kynnoh ia ka BJP ba ka pyndonkam ia ka Enforcement Directorate (ED) bad ka Central Bureau of Investigation (CBI) kum ka atiar ban myntoi ha ka sain hima sima.
U Bah Prestone u la ong ruh ba ka la “slem palat” ia ka BJP ban mih noh na ka sorkar Meghalaya Democratic Alliance (MDA).
U Bah Prestone ula kynthoh ia kane halor ka jingpynpaw jong u National Vice President ka BJP ba khmih ia ka Meghalaya u Dr Chuba Ao ba ong ba hapoh ka shibnai, ka BJP kan sa shim ia ka rai la kan weng noh ne em na ka sorkar MDA ba ialam da ka NPP.
“….ka pyni ba ka BJP ka pynshisha da kaba shai kumba kynnoh ka AAP ne ka TMC ba ka pyndonkam ia ka ED lane CBI kum ka atiar ban myntoi ha ka sain hima sima” ong u Bah Prestone haba iakren bad ki nongthoh khubor.
Haba niew ia ka kum ka buit politics, u Symbud Myntri Rangbah ka Jylla ula ong “Kane ka dei tang ka buit politics da kita ki High Command jong ka BJP lane jong u shimet (Dr Ao) ia kaba ngam tip satia hynrei ka rukom pynmih ia ki jingkynnoh na ka por sha ka por ka I kum ka buit politics”.
Haba pynpaw ba ka NPP ka pdiang ia ka rai jong ka BJP ban weng noh ialade na ka sorkar MDA, u Bah Prestone ula ong “Ka Sorkar MDA hapoh ka jingialam u Conrad K Sangma bad kumjuh ruh ka nongrim jong nga ka long kaba shai bha ba lada ki kwah ban mih noh naka Sorkar MDA, ngi pdiang sngewbha hynrei ngi i ba kala dier pat ka por”.
Haba kylli, une u Nongialam ka NPP u la ong ba ka BJP kala pyrshang ban iada ialade. “Nyngkong ki kwah ban iada ialade. Ki iada ialade da kaba pyndonkam ia ka ED bad CBI ia kaba ki paidbah ki sngewthuh bha. Ka rukom kren jong u Incharge ka BJP Meghalaya Dr Ao “Ngin sa shong mardor, ngin sa mih noh naka Sorkar bad ka ED bad CBI kan sa wan ka paw shai ba ka BJP ka pyndonkam ia kine ki tnad ban myntoi ialade”.
Ha kajuh ka por, u Bah Prestone u la kob ia ka BJP da kaba ong “Ha ka jingshisha, nga kwah ban ai jingmut ba balei ym phah shuwa ia ka ED bad CBI mynta hynrei ban ap haduh da mih naka Sorkar lada phi sngew ba phi khuid. Kane hi ka paw shai ba ka dei tang ka buit politics”.
