Shillong, Nailur 05: U Symbud Myntri Rangbah ka Jylla Bah Prestone Tynsong hynne ka sngi Nyngkong, ula kular ba ka Sorkar kan sa shim ia ka sienjam ban leh eiei pyrshah ia ki briew kiba shong beain ha Maxwelton Estate.
Haba iakren bad ki nongthoh khubor, u Bah Prestone ula ong ba kane ka kam ka hap hapoh ka jingkhmih jong ka Deputy Commissioner (Revenue).
“Ka DC Revenue kan sa leh ia kaba donkam lada shem ba ka dei kaba shisha halor ka jingshong beain jong ki briew ha Maxwelton Estate” ula ong.
Ha ka 1 tarik Nailur, ka KSU kala dawa ia ka Deputy Commissioner ka East Khasi Hills ban kyndang ia ki briew ba shna iing bad shong beain ha Maxwelton Estate , kaba heh haduh 9 acre ka jaka bad kaba hap hapoh u pud u sam jong ka Dorbar Shnong Kenches Trace, Oxford Rilbong.
