Shillong, Nailur 05 : Ka Meghalaya Pradesh Congress Committee (MPCC) kan snohkti lang bad Indian National Congress ha ka – “Bharat Jodo Yatra” ne ka jingiaid kjat na Kanyakumari sha Jammu and Kashmir, kaban sdang naduh ka 07tarik jong u Nailur.
Haba kren sha ki lad pathai khubor hynne ka sngi ha Shillong, ka Babeeta Sharma, General Secretary bad nongai ktien jong ka Assam Pradesh Congress Committee,ka la ong ba ha katei ka Yatra kan don ruh ka jingiasyllok bad ki nong India ha kiba bun ki mat kiba ktah ia ka Ri baroh kawei.
Ia katei ka Yatra ban ialam da u nongialam ka Congress, u Rahul Gandhi kan kynthup haduh 3,500 kilometer naduh Kanyakumari sha Jammu bad Kashmir ha kine ki 150 sngi ban wan. La ong ruh ba kan iaid lyngba ki 12 tylli ki jylla bad 2 tylli ki Union Territories, kata naduh Tamil Nadu, Kerala, Karnataka, Andhra Pradesh, Telangana, Maharashtra, Madhya Pradesh, Rajasthan, Haryana, Uttar Pradesh, Delhi, Punjab, Himachal Pradesh bad Jammu & Kashmir.
Ka la iathuh ruh ba ka thong jong katei ka Yatra ka long ban iohsngew na ki paidbah jong ka Ri halor ki jingeh ba ki nongshong shnong ki kynduh bad pynsngew ha ki nongialam ka Congress.
Katkum ka jingiathuh jong ka, ki don saw tylli ki bynta ba pynlong ia katei ka Yatra, kata ban –
1: Wanrah ia ka jingiatylli hapdeng ki nong India kiba ieng na ka bynta ban iakhun ia ka hok laitluid kumba la maitphang da u Mahatma Gandhi bad ruh kumba la kdew ha ka Riti Synshar ka Ri.
2. Ban pynsngew ia ka sur jong ki klur ngut ki nong India kiba la shah ktah ha ka ioh ka kot kaba lah shilliang, ak jingsngewiapher ha ka imlang sahlang bad ruh ka jingshah knieh noh ia ka hok longtrai.
3. Ka jingiatai ia ki mat bad ia ki lad ki lynti khnang ba ki paidbah kin lah ban weng ia ki jingeh bad kaba
4. Ban pynkhlain shuh shuh ia ka shongsuk shongshngaiñ.
La pyntip ruh ba la jied haduh 118 ngut ki Yatri na kylleng ki bynta jongka Ri kiban shim bynta ha katei ka jingiaid lynti na Kashmir sha Kanyakumari. La pyntip ruh ba ka PCC ka la jied ruh 100 ngut ki Yatri na ki jylla kiba katei ka kynhun kan iaid lyngba bad ruh ia ki Atithi Yatri na kiwei pat ki jylla. La ong ruhba man ka jylla ba ki Yatra kim dei iaid lyngba kin sa pynlong noh da ka jingiaid ba man la ka iing ban poi sha baroh ban pynsngew halor kane ka khubor jong ka Yatra.
