Nongpoh, Jylliew 04 : Ki Pulit ka Ri-Bhoi District, kila ioh kem biang ia ki arngut ki koidi kiba phet tuh na ka kti ki Pulit ha Nongpoh Civil Hospital mynta la jan 7 bnai.
Kine ki arngut ki koidi ki kyrteng u Sunil Das ba 29 snem ba na College Road, Dudhnoi bad u Pappu Chettri ba 32 snem, uba dei na Mawsyntai, Ri-Bhoi District.
Kat kum ka jingiathuh ki Heh Pulit, kine ki arngut ki koidi kila phet tuh na Nongpoh Civil Hospital ha ka 15 tarik Naiwieng, 2024. Kine baroh arngut kila riehtngen ha Goalpara District ka Assam da ki kyrteng thok.
Ia u Sunil Das la kem da ki Pulit ka Ri-Bhoi myn ha ka 29 tarik Jymmang da ka jingiarap ki Pulit ka North Garo Hills. Une u runar ula shah pynngat kam bymman ha ka sien ba nyngkong eh hapoh ka Nongpoh PS Case No 48(03) 2022 hapoh ka kyndon 224 IPC bad ula pyndep ia ka jingshong along ha ka 22 tarik Iaiong, 2023.
Hynrei ula shah kem biang bad shah pynngat ha ka Nongpoh Women PS Case No 07(12) 2018 hapoh ka kyndon 5(l)(m)(n)/6 of POCSO Act bad ula ngat shong phatok shirta jingim. Une u runar u la don hapoh ka Judicial Custody ha ka por ba u phet tuh.
Ia u Pappu Chettri la ioh kem hynne ka 3 tarik Jylliew, 2025 da ka jingiarap ki Pulit ka North Garo Hills. Une u runar ula shah kem kat kum ka Nongpoh Women PS Case No 59 (10)2019 hapoh ka kyndon 341/363/376 (2)(I)IPC.
Ki iathuh ba ia u Sunil Das la dep phah mynta sha phatok katba ia u Pappu Chettri yn sap hah sha phatol lashai ka sngi namar ki Pulit ka Ri-Bhoi ki dang don ha lynti na Goalpara ban wan tian bishar ia u ha Iingkashari Nongpoh lashai ka sngi.
