Nongstoin, Risaw 15: U Myntri Rangbah ka Jylla u Conrad K. Sangma ha ka sngi Palei ula plie ia ka building thymmai ka Synod College ha Nongstoin, West Khasi Hills, ryngkat ka College Library ba thymmai bad ka Smart Classrooms.
Ha kane ka jingplie la iadonlang u Myntri Sorkar u Bah Methodius Dkhar bad ki MLA kiba kynthup ia u Bah Gabriel Wahlang bad u R.G. Momin.
Haba kren ha ka jingialang, u Conrad Sangma ula ong ba ka sorkar jylla kala pynlut ha kine ki 8 snem kiba lah dep da kaba pyrkhat bad pynwandur biang ia ka jinglong jingman jong ka pule puthi ha Meghalaya, naduh na ki jingpule ha ki skul shaduh sha ka kyrdan kiba heh.
Da kaba pynpaw ba ka pule puthi kadei ka u shabi ban kyntiew ia ka roi ka par, ula ong ba ka State Education Policy la pynwandur da ki riewshemphang ban shimkhia thikna ia ki jingeh ha ka jaka ban pynleit jingmut tang ha ki jingkdew jong ka Percentage Pass jong ka Secondary School Leaving Certificate (SSLC).
Kum shi bynta jong ka jingwanrah ia ki jingkylla, la pynbeit ryntih ia ka rukom treikam jong ki skul, ha kaba la pynduna ia ka jingdon ki skul na ka 14,000 sha ka 11,500 lyngba ka jingpyniasohlang bad ka jingwan thymmai” la ong u Myntri Rangbah.
Haba pynpaw ia ka jingpyniar ka Sorkar Jylla ia ka Higher bad Technical Education, u Sangma ula ong ba ka Meghalaya ka don kumba 10 tylli ki jaka pule Government Higher Technical bad College hashwa u snem 2018. Sa 10 tylli ki jaka pule la nang mih shuh shuh ha kine ki 8 snem kiba la dep” ula ong.
Kine ki kynthup ia ka Shillong Engineering College, Captain Williamson Sangma University, College of Architecture and Urban Planning, Shillong Medical College bad ka Science bad Commerce College ha Mahendraganj, Mawphlang bad Sohra bad kiwei kiwei.
U Sangma ula ong ba ka pule puthi ka ioh pdiang ia ka mang tyngka kaba heh duh ha ka jylla, ha kaba T.3,500 Klur lah mang na ka Mang Tyngka kaba shi snem jong ka Meghalaya kaba T.30,000 Klur.
“Ka jingkylli kam dei ba ka don ka jingduna pisa. Kaj ingkylli ka long kumno phi pyndonkam ia ka bad kaei ka jingkylla kaba wanrah na katei ka jingpynlut” ula ong.
U Myntri Rangbah ula kdew ba ka jingsam ia ka Scholarship kala jan kot ia ka T. 400 klur ha kine ki 12 bnai kiba la leit.
Ula pynpaw ba ka jingpyllait ia ka T.100 Klur shwa ka Khristmas ha u 2025, sa T.100 klur ha ka 27 tarik u Nailar 2026 bad T. 104 klur ha ka 13 tarik u Risaw 2026.
Haba batai ïa ki jingeh ha ka jingwanrah ia ki jingkylla ïa ka rukom treikam jong ka pule puthi, u Sangma ula ianujor ïa ka jinglaw ia ka jingsoh kyrdot jong u waiar Headphone bad ka banjur ia ka jingdonkam ban long kiba ïaishah bad ban ïatreilang bad baroh kiba don bynta lang.
“Ka pule puthi ka long kum u waiar headphone uba la sohkyrdot. Lada phi tan eh na kawei ka liang ka jingsohkyrdot kan nang skhem bha. Phi hap ban law da ka jingjaijai uwei pa uwei, ban kynthup lang ia baroh kiba donbynta bad ban pynduna ia ka jingshah ktah. Kane kadei ka rukom leh kaba ngi lah shim” ula ong.
Ula pynkynmaw ïa ki jingai jingmut jong u Kpa jongu u P.A. Sangma ba la khlad noh, uba la long u Lamphang barim jongka Lok Sabha. “Ngeit ba phi leh ïa kaba dei bad u don uba najrong u ban sa pynkhih ïa ka pyrthei baroh kawei, ban pynthikna ba kan urlong”.
Ula bynrap ba ki don katto katne ki projek kiba la mynjur watla haba ia ki tyllong jong ka jingbei tyngka kadei ka bym shim la pyllait mardor ia ka pisa, kaba donkam ia ka sorkar ba kan leit mih sha ki bor jong ka Sorkar Pdeng bad sha ki Tnad Sorkar ban wad ia ki lad ban ioh ia ka jingbei tyngka.
U Sangma ula pynthikna ïa ka Governing Body jong ka Synod College ba ka Sorkar Jylla kan trei bad ka jaka pule ban shimkhia ia ka jingdonkam ka jongki, kynthup ia ki jingtei bad ki kam kiba iadei bad ka jingeh ha kaban siew ia ka tulop.
“Wat nym khuslai. Kaba phi leh ka long kaba dei. Phi leh ïa kaba bha na ka bynta ka imlang sahlang, na ka bynta uwei pa uwei u khynnah u bym lah ban ïoh ia ka kabu ban pule ha kum kane ka jaka pule. Ngim lah ban shna ïa ka jaka pule tang hapoh k shi miet, ngin mad ia ki jingeh ha ka jingsiew tulop bad ki jingtei, hynrei ngin wad ïa ka lad bad lynti” ula ong.
U Myntri Rangbah ula ïaroh ruh ïa u Rev. S.S. Majaw bad ia ka Balang Presbyterian halor ka jingnoh synñiang sha ka pule puthi ha Meghalaya da kaba ong, ba ki kam kaba ki trei ka long ban ai ia ka jingshakri na ka bynta ka bha ka miat jong ka imlang sahlang.
Kane ka jingtei kaba thymmai, Library bad Smart Classrooms kadei kaba la khmih lynti ban pynkhlain ia ki jingtei jong ki jaka pule jongka Synod College bad ruh ban pynbiang shuh shuh ia ki jingdonkam na ka bynta ki samla ha kylleng jong ka thaiñ West Khasi Hills.
