Shillong, Jylliew 03 : U Myntri Rangbah ka jylla u Conrad K Sangma hynne ka sngi u la ong ba ka sorkar ka la buh hakhmat eh ban pyndonkam ia ki kor teknoloji ha ka ban pynthikna ia ka jingpynbiang ia ki jingshakri paidbah kiba paka.
U Conrad u la pynpaw ia kane haba kren ha ka prokram jong ka tnat Social Welfare kaba la long ha NEHU Convention Hall Shillong haka prokram sam tiar kynthup ki Mobile Phone sha ki Nongtrei ha Anganwadi, ki syrnod sha ki Kynthei kiba la ioh jingshah hikai pyntbit ban sengkam lajong ha Shillong bad Jowai, ki tiar IIT Innovative, EcoH20 shaki Anganwadi Centre ban pynbiang ka umdih kaba khuid na ka bynta ki khynnah, ka song pisa sha ki nongïoh jingmyntoi ba thymmai na ka CM Care, ka jingai khublei ïa ki nongjop na ki Children’s Homes, ka jingplie ïa u mawnongrim na ka bynta ban tei ïa ka Children’s Home (Boys) Nongstoiñ bad ka jingplie ïa u mawnongrim ban tei One Stop Centre ha Ganesh Das Hospital Shillong.
U la pyntip ka jingpyntreikam iaki kor teknoloji ha ki prokrem ba pawkhmat jong ka jylla lyngba ka MOTHER App ka sorkar ka la lah ban pynduna iaka jingkhlad ki longkmie ba armet lane ka Maternal Mortality Rate hapoh ka jylla Meghalaya.
“Da kaba pyndonkam ia kane ka teknoloji bad lyngba kiwei pat ki prokram jong ka sorkar jylla na ka bynta ka jingiada iaki longkmie, ngi la lah ban pynduna ia ka jingiap jong ki longkmie da 45% bad ka mobile kaba la ai ha phi mynta ka sngi ka lah ban pynim bad wanrah jingkylla ia ki spah ngut ki jingim”, u la ong.
U Myntri Rangbah u la kyntu ïa ki nongtrei anganwadi ban pyndonkam hok ïa ki tiar mobile ha kaba buh ïa ki jingtip na ka bynta ban pyntreikam hok ïa ki polisi bad ki prokram jong ka Sorkar.
“Ki jingtip kiba phin phah sha ngi kin ïarap ïa ngi ban tuklar, ban shim ïa ki rai bad ban shim ïa ki sienjam ki ban pynim bad wanrah jingkylla ïa ka jingim jong ki khynnah,” u la bynrap.
U Myntri Rangbah u la bynrap shuh shuh ba ki kor teknoloji kam pynkylla tang ïa ka jingsynshar hynrei ka thaw ïa ka jingsynshar kaba kham ktah kaba ïarap ban pynurlong ïa ki thong bad ki jingthmu da kaba kham sted.
U la ong ba ka tnat social welfare ka pyrshang ban ktah ïa ki jingim bapher bapher ha ka imlang sahlang bad u la pynbna ïa ka prokram kaba dang don ha ka jingpynkhreh, ka CM Care+, ka ban ïarap ïa ki nongpang bapher bapher na ki longïing kiba duna ha ka liang ka ioh ka kot ban pyndap ïa ki jingdonkam jingsumar jong ki na ka bynta ki jingpang ba shyrkhei.
Ha kane ka sngi la donlang ruh u Myntri ka tnad Social Welfare, u bah Paul Lyngdoh, u Commissioner & Secretary ka tnad Social Welfare, u Pravin Bakshi lem bad kiwei kiwei de.
