SHILLONG, Jymmang 30: U Executive Engineer ka MePDCL, Jowai Distribution Sub Station, Bah L Syngkon, ula kular ban sa weng noh ia ka jingshongdum jong ka shnong Madan Pohkseh, West Jaintia Hills la katto katne snem mynta.
Kane ka jingkular kala mih ha ka jingiakynduh bad ka Jaintia National Council-Western Zone, hynne ka sngi Thohdieng, kaba la leit iakynduh ia une u Engineer halor ka jingud jingnam jong ki paid nongshongshnong ka Madan Pohkseh.
Ka JNC hapoh ka jingialam u President Hamehi Bamon, kala aiti ruh da ka dorkhas ba dawa pynioh bording noh ia kane ka shnong kaba hap hapoh ka Laskein Block.
Ka JNC kala ong ba ka Madan Pohkseh ka dei ka shnong kaba la rim bha bad ka seng ka sngew lyngngoh ba ha kum kane ka juk ba mynta, kane ka shnong ka dang shong ha ka jingdum khlem ka bording, kaba long ka jingduhnong kaba khraw ia ki nongshongshnong khamtam ki khynnah skul bad ki samla pule.
La iathuh ba u Executive Engineer ula ai ka jingkular ban sa pynioh bording noh ia kane ka shnong bad yn sa pyndap ne thep kyrteng ia kane ka shnong ha ka skhim RDSS ka ban sa pyllait tender ha kine ki khyndiat bnai ban wan.
Ka JNC-Western Zone kala pynpaw ia ka jingsngewnguh ia une u Engineer bad kyrmen ba ka shnong Madan Pohkseh kan sa ioh bording noh hapoh une u snem ba mynta.
