Shillong, Jymmang 30 : Arngut ki briew kila iap katba 3 ngut kila mynsaw na ka jingjia kiba wan jia na ka jingther u lapbah hynne ka sngi Thohdieng. Kine kiba iap bad ba mynsaw ki dei na East Khasi Hills District.
Ki briew kiba iap ki dei kiba la tip kyrteng u Bah Klosliya Kharkongor ba 50 snem na ka shnong Lumkyntung kaba hap hapoh ka Laitkroh-Khararshnong Block, uba la khlad na ka jingtwa khyndew bad u Bah Samborlang Tariang ba 35 snem, ba na Mawbynna, Pomlakrai, uba iap na ka jingngam jyllop.
Haduh 25 tylli ki shnong kila shah ktah ha kane ka jngther u slap uba la neh la arsngi tam mynta bad haduh 1023 ngut ki briew kila shah ktah. Haduh 14 tylli ki shnong ki dei kiba na East Khasi Hills.
Une u slap ula pynjulor ruh haduh 12 tylli ki iing bad 4 tylli na kine, ki dei ha East Khasi Hills bad haduh 25 tylli ki jingtei kynthup ka Iingskul, kila julor na une u slap.
Na ka liang u Myntri Rangbah ka Jylla Conrad K Sangma, ula lum ia ka jingialang bishar kam halor kane ka jing lynshop ki bor ka mariang bad bthah ia baroh ki bor District bad ki Tnad Sorkar ba kin peitngor bha bad ban shim ia ki sienjam kiba donkam ban pynduna ia ka jingshah ktah.
U Myntri Rangbah ula bthah ruh ia ki Deputy Commission ban pyllait ia ka song pisa ba T.4 lak sha ki bahaiing jong ki briew kiba iap.
