Shillong, Jylliew 15: U Myntri ka Tnad Arts & Culture Bah Sanbor Shullai ula hokum ban pynpra bad shna thymmai noh ia ka District Library Auditorium bad Musuem ha Mynthong, Jowai namar ka jingshem ba kane ka jingtei ka dei kaba shong synjor bad buh jingma ia ki paidbah bad ki Nongtrei ka Arts & Culture.
U Myntri ula pynbna ia kane hadien ka jingjurip ia kane ka jingtei myn ha ka 14 tarik Jylliew bala synran da ki Ophisar jong ka Tnad Arts & Culture, ki Nongialam ka Synjuk ki Waheh Shnong Jowai bad kiwei kiwei.
“Ka jingwan jurip jong nga ka dei halor ka dorkhas bala aiti da ki Nongialam Shnong bad ka JSU bad nga shem shisha ba ka jingtei ka long kaba shong synjor bad kaba buh jingma ia ki paidbah bad ia ki Nongtrei ka Tnad kiba treikam na kane ka jaka” ong u Bah Sanbor.
“KI paia bad ki bim kila sdang ban orpait bad wat ki nar rod kila sdang ban wan lut shabar.Kane hi ka dei ka dak ba ka jingtei kala shong synjor” ula bynrap.
Haba pynpaw ia ka jingsuba ba don ka bamsap haba tei ia kane ka jingjia, u Myntri ula ong “Lada peit ia ka durkhmat jong kane ka jingtei la I shai ba ka dei tang ka jingtap eitmiaw ia ka kam bamsap ha ka por ba shna ia kane ka jingtei. Mar syn tip ba kan don ka jingwan jurip, kala don ka jingmaramot ia kiba la julor ia kaba ngam sngewhun satia da lei lei ruh”.
“Kam long satia kaba biang ban shu maramot ia kane ka jingtei hynrei la donkam beit ban shna thymmai na ka bynta ka jingshngaiñ jong baroh lang”.
“Dei ban pynpraw ba thaw thymma noh ia kane ka District Library bad Musuem da kaba bud ryntih ia ka Building By-Law jong ka Jylla bad ban tei syndon da kaba 5 mala, hynrei kane kan shong pat hadien bala dep ban jurip bniah ia katei ka jingtei da ka kynhun na Delhi” ula bynrap.
Ia kane ka District Library Auditorium bad Musuem la tei naduh u snem 1987.
