Shillong, Jymmang 27: Ka Tnad Pule Puthi jong ka jylla Meghalaya kala ai nam ba ia ka jingthaw ia ka rekod jong ka jingpass kaba kot sha ka 96% ha ka eksamin SSLC kadei hadien ba kala don ka jingpynkylla thymmai bad ka jingwanrah ia ka CM Impact Guidebooks — kine ki mat kiba kongsan kila wanrah ia ka jingkylla kidei da ka jingthmu ban pynsuk ia ka rukom pule puthi bad ban kyntiew ban lah ban kiew shaphrnag khamtam ha ki thain nongkyndong.
U Commissioner & Secretary uba khmih ia ka tnad pule puthi u Vijay Kumar Mantri, ula ong ba ka jingiaid ka jylla ban pyniaryngkat ia ki jingkylli ka SSLC kaba iaryngkat kyrdan bad ka CBSE bad ICSE kala kyntiew shibun ia ka jinglah ban leh bha ki khynnah.
“Mynshwa, ki jingkylli ki jong ngi ki long kiba jrong bad kiba iar, don kiba la long haduh 20 sla. Mynta da ka 25–35 MCQ bad ka Format kaba khamsuk ka resol kala kynthih bad ngi mynta ngi lah iaryngkat bad ka CBSE, ICSE ha kaba iadei bad ka jingpass bha” ula ong.
Ka CM Impact Guidebooks kaba la wanrah ia ka jingkylla
U Mantri ula pynpaw ba ka jingjop jong ka CM Impact Guidebooks, khamtam eh ha ki thain nongkyndong ia kaba ki shem jingeh bha ban ioh ia ki kot ki sla. “Kitei ki kot kiba la don ia ki jingkylli bad ki jubab kila iarap shibun ia ki samla pule ban pynkhreh thikna bad ban leh bha, khamtam haba kim don ne ioh ia kino kino ki jingthoh” ula ong.
Ka jingnang jingstad ha ka jylla kala palat ia ka 94%, kaba la buh ia ka Meghalaya kum kawei napdeng ki ‘Top Five’ hapoh ka ri. “Kane kam dei tang shaphang ka percentage jong ka jingpass, kadei shaphang ka jingpule, jingthoh bad ka jingsngewthuh ia kano kano ka mat” la ong u Mantri.
Ki jingshimkhia lyngba ka Sarva Shiksha Abhiyan ruh kila iarap ia ki khynnah skul bad ia kiba la heh ban leit phai biang sha ka thup jong ka jingpule.
Ka Tnad kan sa pynmih ruh ia ka Guidebooks na ka bynta ki nonghikai naduh Klas 1 haduh 10 ban kyntiew ia ka rukom ai jinghikai. “Ngi pynleit jingmut ha ka rukom pyntreikam, ki nuksa kiba shisha bad ki jingialehkai ban pynlong ia ka jingai jinghikai kaba thikna bad kaba bha” la ong u Mantri.
Ka prokram kaba shi bnai kum ka Meghalaya Class Studies and Learning Enhancement Program kadei da ka thong ban weng ia ki jingeh ha ka jingai jinghikai bad ban kyrshan ia ki nonghikai.
Watla ki jingkylla kila wanrah ia ka jingseisoh, hynrei ki jingsngewkhia kidei halor ki jingtei. “Palat T.2,400 klur naka bhah tyngka ka leit sha ka jingsiew ia ka tulop, kaba buh pat tang khyndiat eh naka bynta ki kam pynroi. Ka jingther u lapbah ruh kadei kaba la ktah jur bha” ula pynpaw.
Ban shimkhia ia kane, la kyntiew ia ki 65 tylli ki skul hapoh jongka ADB Scheme bad bun shuh shuh kin sa shah kynthup ha ka wat kaban sa wan jong ka Mission Education.
