Ai ei ki trai khyndew ïa la ki jaka ban ioh surok na ka sorkar
Nongstoiñ, Nailur 4: Ki nongïalam ka Synjuk Rangbah Shnong Nongtrai Area ryngkat ki trai khyndew, kila pynpaw ia ka jingkyrmen ba ka sorkar khamtam ka tnad PWD road ba kan shimkhia ha ka ban pynioh surok noh sha ka thain, kumba la dep ban kyrpad bad shah sngewbha ruh ban shna surok khlem da siew bai khyndew.
Lah ban pynkynmaw ba ki nongialam shnong ryngkat ki trai khyndew, ha u bnai Jylliew mynta u snem ki la leit ban ïakynduh ïa u bah P.D.Sangma Deputy Commissioner barim ka West Khasi Hills, ban aiti ïa ka soskular kaba ki la dep ïasoi ba kin shah sngewbha lada ka sorkar kan shna surok lyngba ki jaka jong ki.
U bah Birbor Riangtem nongïakam ka Synjuk haba ïakren bad u nongthoh khubor, u la ong ba ha u snem ba la dep u bah T.Lyngwa Deputy Commissioner barim ka West Khasi Hills, u la wan jngoh ïa katei ka thaiñ bad u la lum ruh ïa ki rangbah shnong ban ïa phylliew jingmut halor ki kam pynroi bad kiwei kiwei.
“Hadien katei ka jingïaphylliew jingmut, ngi la leit ban ïakynduh ruh ïa u Executive Engineer Nongstoiñ Division, ban kyrpad ba un ïarap lem ban pynsngew ha ka sorkar na ka bynta ban pynïoh surok na Mawdiang sha Langdongdai, ka ban pynïasoh bad ka surok PMGSY kaba poi haduh Malangkona” ula iathuh.
U bah Riangtem u la iathuh ba ka jingjngai jong ka surok na Mawdiang haduh Langdongdai, ka don kumba hynriew kilomitar shiteng bad lada shna surok, hap ban ïaid lyngba ïa ki jaka jong kiba bun ngut ki nongshong shnong.
“Kumta ban ym don kano kano ka jingkhñium ne ka jingwit lada shna surok lyngba kitei ki jaka, ki nongïalam ka Synjuk ki la pynsngewthuh ïa baroh ki trai khyndew, ba kin shah sngewbha lada ka sorkar kan shna surok lyngba ki jaka jong ki khlem da siew bai khyndew” ula ong.
U la ong ruh ba hadien ka jingpynshai, baroh ki trai khyndew ki la mynjur bad pdiang sngewbha lada ka sorkar kan shna surok ban pynpoi haduh Langdongdai.
“Ngi la pynskhem ia kane da kaba ïathoh da ka soskular kaba skhem, ha kaba baroh ki trai khyndew ki la ïa soi lang bad ïa katei ka soskular ki la aiti ha u Deputy Commissioner ba un leh ïa kaba don kam” ula pyntip.
Ha katei ka jingleit ïakynduh jong ki, u Deputy Commissioner u la kular ba un sa bthah ïa u Executive Engineer ka PWD Nongstoiñ, ba un leh kloi ïa katei ka kam na ka bynta ka jingmyntoi jong ki paitbah ka thaiñ. “Ngi ki paidbah ki kyrmen skhem bad ap dngong ruh ba ka tnad ba dei peit kan leh kham kloi halor kane ka bynta” ula ong.
