Shillong, Jymmang 27 : U Myntri Rangbah ka Jylla Conrad K Sangma hynne ka sngi Ba-ar, ula aiti ia ki smartphone sha ki nongtrei Anganwadi ha ka jingialang kaba long ha St.George Higher Secondary School, ha Samanda, East Garo Hills.
Ki nongtrei Anganwadi na kylleng ki jaka jong ka East Garo Hills, kila wan ban iashimbynta ban iohpdiang ia ki smartphone na u Myntri Rangbah.
Haba kren ha ka jingialang, u Myntri Rangbah ula ong ba kine ki smartphone kin nang kyntiew bad pynjanai ia ka jingtreikam bad ka jingshakri jong ki nongtrei Anganwadi.
Ka Ministry of Women and Child Development kala bei ia ka pisa ba T.6 klur ban thied haduh 6,162 tylli ki smartphone na ka bynta ki nongtrei Anganwadi, ki ban iarap ia ki ha ki kam kiba kongsan.
U Myntri Rangbah ula pyntip ba la dep thep ia ka POSHAN App ha kine ki smartphone, ha kaba ki nongtrei Anganwadi kin pyndonkam ban buh jingthoh bad ki jingtip bad leh ruh ia ki kam ba iadei bad ka jingai kaiphod, ka ban pynthikna ia ka jingpeitngor bad jingpyntreikam bha ia ki skhim ka bha ka miat ha ka imlang sahlang.
Ula pyntip ruh ba ki nongtrei Anganwadi kin sa ioh ruh ia ki jingsiew na ka bynta ka jingleit khmih man la ka por ia ka jingheh jingsan jong ki khynnah haduh ka rta ba 6 snem da kaba thew ia ka jingjrong bad jingkhia bad ban thep ruh ia ki jingkhein baroh ha ka POSHAN Tracker.
Ha kane ka jingialang,u Myntri Rangbah ula sam ruh ia ka IIT Innovation ECO H20 Filter sha ki Anganwadi Centre, da ka jingthmu ban pynioh ia ka umbam umdih kaba shngain ia ki khynnah ha ki jaka nongkyndong.
Ula plie paidbah ruh ia ka jingtei ba thymmai jong ka St.George Higher Secondary School, Samanda, bad aiti ia ka sha ki khynnah skul bad pynpaw ruh ia ka jingkyrmen ba kan nang aimynsiem ia ki ha ki jingpule bad ka jingroi. Nalor kane, ula air uh ia ki M-Tab (Digital Learning Aid sha ki khynnah skulk a St George.
Kiba la iadonlang ha kane ka sngi ki kynthup ia u Myntri ka Tnad Social Welfare Bah Paul Lyngdoh bad u Myntri ka Tnad PHE Marcuise Marak.
