Shillong Jymmang 26: U Myntri Rangbah ka Jylla u Conrad K Sangma hynne ka sngi Nyngkong, ula pyllait paidbah ia ki katto katne ki sienjam kiba iadei bad ka Climate Action and Climate Adaptation goals ha Meghalaya ha ka jingialang kaba la long ha Mendipathar ha North Garo Hills.
Ula buh ruh ia ki mawnongrim jong ki sienjam ki bapher bapher ha ka jingdonlang u Myntri ka tnad PHE u Marcuise Marak bad u Myntri ka tnad Social Welfare u Bah Paul Lyngdoh bad ki MLA kiba kynthup ia u Marthon Sangma bad u Rupert Momin bad ula plie ruh ia ki artylli ki Girl’s Hostel ha Mendipathar bad ka Tribal Hostel ha Resubelpara.
Ula pyntip ba ka Climate Adaptive Community-Based Water Harvesting Project kaba la kyrshan da ka ADB, ka long ka projek kaba palat ia ka T.500 Klur ia kaba yn pyntreikam ha kylleng ki district jong ka jylla Meghalaya ban kyntiew ha kaban pynneh ia ka jingdon ia ka um ka wah.
Ula plie ruh ia ka “Megh Adapt Pay”, ka project kaba T. 47.19 Klur bad kane ka projek kadei shi bynta jong ka Climate Adaptive Community Based Water Harvesting Project ban thung ia ki dieng, ban pynneh pynsah ia ki khlaw kiba la don lypa, ki jaka rep kiba la don lypa kiba la pyntreikam da ka Soil & Water Conservation Department.
U Myntri Rangbah ula pyntip ba lyngba kitei ki projek, ki shnong ki thaw bad ka sorkar kin iatreilang ban iarap ha kaban iada ia ki khlaw, ban kyntiew ia ka sawdong sawkun ha kaba iadei bad ka koit ka khiah, ban pynneh ia ki jaka kiba don ia ki tyllong um bad ban pyniar ia ka jingjyrngam ha kylleng jong ka jylla.
Ia ka Girls’ Hostel ha Mendipathar College, la tei ha ka jinglut jingsep kaba kot T.3 Klur kaban pyniaid da ka Awe Self-Help Group (SHG), katba ia ka Tribal Girls’ Hostel ha Resubelpara la tei ha ka jinglut kaba kot T.2.5 Klur bad yn pyniaid da ka Ramke Memorial School.
“Kine ki Hostel kin ai ia ka jingshngain, jingiada bad kyrshan ia ka rukom im jong ki kynthei khamtam eh ia kito kiba wan na ki thain nongkyndong bad kan iarap ruh ha kaban pynlah ia ki ban bteng ia ka jingpule khlem kino kino ki jingeh” ong u Myntri Rangbah.
Ula pynpaw ruh ia ka jingkmen halor ka jingkiew jong ka Percentage ha ka jingpass ia ka Eksamin SSLC bad ula pyntip ba ka Result jong ka Supplementary Exam kala nang kyntiew ia ka percentage jong ka jingpass sha ka 96 percent, kaba long kaba heh tam ha ka thain shatei lam mihngi bad kaba bha tam hapoh ka ri.
Ula ong ba bun kila kren bakla bha shaphang jong ka “CM Impact” guidebook hynrei kylli pat na ki khynnah pule bad na ki kmie ki kpa. Ula ong ba ha ki snem kiba la dep, bun kila pyndonkam ia ki Guidebook ha ka SSLC bad ha kiwei kiwei ki eksam bad ka CM Impact kadei ka jingtuklar ban kyrshan ia ki khynnah pule ki bym don ia ka lad ban ioh ia kitei ki Guidebook.
“Nga dap shisha da ka jingsngewhun ba ki khynnah ki jong ngi kila lah ban pass ia ka eksamin SSLC. Ka Guidebook kala iarap bha ia ki. Nga ai khublei ia ki khynnah kiba la pass ha kane ka eksamin” ula ong.
