Thalain u MP ia ka NGT ba kynnoh ‘trei arsap’ | Byrngem ban rah iakren ha Parliament

Khapbrip ka NGT ia ka jingiap ki briew na ka jingpynmih jaboh ki karkhana

Shillong, Jymmang 26 : U MP ba marwei ka Rajya Sabha na Jylla Dr WR Kharlukhi ha ka sngi Nyngkong, ula ther tyngeh ia ka National Green Tribunal (NGT) halor ka jingkynnoh ba ka “trei arsap’ bad ong ba khlem pep, un sa rah iakren ia kane ka mat hapoh ka Iingdorbar Parliament.

U Dr Kharlukhi uba dei ruh u President barim ka National People’s Party (NPP)-Meghalaya, ula kynnoh ba ka NGT kam shym la leh eiei halor ki khubor ka jingiap da ki million ngut ki briew na ki jingpang kiba mih na ka jingpynmih jaboh jong ki karkhana hynrei ka kloi pat ban shimkhia bad leh eiei pyrshah tang ia ka jingpynjaboh ia ka mariang.

“Ngan sa wanrah da ka zero hour notice ha Parliament. Hooid, ka NGT ka long pyrshah bha ia ka jing tuh dewiong beain ha ka Jylla, kila ialeh pyrshah ia ki briew jong ngi bad kala ktah jur bha ia ki nongtih dewiong barit baria. Hynrei kaei kaba pynshaiong ia nga ka dei ka khubor kaba mih ha ka The Hindu ba ong ba da ki million ngut ki briew kila iap namar ka jingpynmih jaboh jong ki karkhana. Ka NGT kala leh ia aiu halor kane, bun ki metros kila shah ktah namar kane? Ngan sa rah iakren ia kane ka mat ha Parliament…kane hi ha nga ka dei ka jingtreikam arsap” ong u MP haba iakren bad ki nongthoh khubor.

“Ki briew jong ngi kila shah ktah bha na ka jingkhang tih dewiong ka NGT ha u snem 2014 khamtam ba ka kam tih dewiong ka dei ka lad kamai jakpoh da ki sawphew snem ia ki hynrei kynsan kynsan la shu khang ia kane ka kam” ula ong haba bynrap, ym tang ba ka ktah ia ka kamai jakpoh jong ki hajar ngut ki briew hynrei kala ktah jur ruh ia ka jingioh lum khajna jong ka Jylla bad ki Autonomoous District Council (ADC).

“Kaba pynshaiong eh ia nga ka long balei ba kam (NGT) leh eiei pyrshah ia ki karkhana, kiba la long shai bha ha ka kot khubor The Hindu ba da ki million ngut ki briew kila iap na ki jingpang ba pynmih jaboh ki karkhana” ula bynrap.

Haba kylli, u Dr Kharlukhi ula ong “Phi iohi ba ki ong ba ka jingtih dewong thliew khnai ka ktah ia ka mariang hynrei ka jingpynjaboh pat da ki karkhana kaba ktah ia ki jingim ki briew ?. Ka mut ka jingim briew kam long kongsan? Nga sngew ba ka jingim ki briew ka dei kaba kongsan kum ka mariang hynrei kaei kaba nga mut ban ong ka long ba ki dei ban wadbniah balei b aka jingtih dewiong ka ktah ia ki wah?.

Ula iai bteng da kaba ong ba ha ka jingshem jong u, ki wah kila kylla jaboh namar ka jingpynhap dewiong ym dei na ka jingtih dewiong. Ula ban jur ia ka jingdonkam ban don ka jaka kaba biang ban pynhap ia u dewiong khnang ban pynthikna ba ka um acid na u dewiong kan nym tuid sha ki wah.