Shillong, Nailur 03: U heh Pulit IPS Bah Mariahom Kharkrang hynne ka sngi saitjain, ula leit pyniasoh ialade sha ka Bharatiya Janata Party (BJP) hadien ka rai ban iakhun ia ka elekshon MLA-2023 na North Shillong Constituency.
Ia u Bah Kharkrang la pdiang sngewbha da u National General Secretary ka BJP u BL Santosh ha ka jingiadon ryngkat u Myntri Khynnah ka Ministry of Culture and Parliamentary Affairs Arjun Ram Meghwal, u Myntri ka Sorkar Jylla Bah Sanbor Shullai, Myntri barim ka Sorkar Bah A.L.Hek, u President ka BJP-Meghalaya Bah Ernest Mawrie bad kiwei.
“Nga jied ia ka BJP na ka bynta ka roi ka par namar nga kwah ba ka Jylla jong nga kan roi” ong u Bah Kharkrang haba iakren bad ki nongthoh khubor.
Ula bynrap “Ngan dei u kyrtong ban iakhun ia ka elekshon hynrei ka ticket ka shong ha ki Nongialam ka BJP la kin mynjur ban ai ia nga ne em”.
U Bah Kharkrang ula shong thait hi da kaba shim ia ka Voluntary Retirement (VRS) myn ha ka 1 tarik u Nailur.
Haba kylli, u Bah Kharkrang ula ong “Ngam kren satia ia ka Constituency jong nga hynrei ki paidbah kila iohi la kata ki snem ba kumno ngi la treikam. Kane hi ka pyni bad kan iarap ia ki paidbah ba kin sngewthuh ia kaei ka ba kin khmih lynti na nga”.
“Ta ka daw nga ong ba lada ngi kren ia ka jingshngain, kumba nga la trei ha ka por ba long Superintendent of Police ka Shillong, kane hi ka juh kan treikam ha ka kam sain hima sima” ula ong.
