Shillong, Nailur 03: Da ki spah ngut ki nongkyrshan jong u MLA bad MDC barim ka Mawlai Bah Embhah Syiemlieh ki la leit ban pyniasoh ialade sha ka National Peoples Party (NPP) ha ka jingialang kaba long ha Community Hall jong ka Mawlai Mawdatbaki.
Ia u Bah Embhahlang bad ka kynhun la pdiang burom da u National Vice President ka NPP Bah Prestone Tynsong nangta u President ka Meghalaya NPP Dr. WR Kharlukhi bad kiwei kiwei ki nongialam ka party.
Haba kren ha ka jingialang hadien ba la dep pdiang burom, u Bha Embhahlang u la ong ba da ka jingwan pyniasoh jong u ryngkat ka kynhun ka la pynlong ia u Bah Teibor Pathaw uba dei u kyrtong ka NPP na Mawlai ba un khur suk ia ka jingjop ha u 2023.
“Da ka jingwan pyniasoh jong ngi, ngin pyntikna shuh shuh ba u Bah Teibor un jop suk kum u MLA ka Mawlai ha u 2023,” ong u Bah Embhah.
Da kaba pynpaw ba dei ka jingbym niewkor ki nongialam ba thymmai ka UDP Mawlai ia ki nongialam barim kaba pynlong ia u bad ki Nongkyrshan ban mih noh na ka party, u Bah Embhah u la “Ngim sngewtynnad shuh ban don ha ka party ka bym khein snep ia ki nongtrei kiba la shakri ia ka party ha ki snem ba la dep”.
Na ka liang u Bah Prestone Tynsong pat u la ong ba ka jingwan jong u Bah Embhah kan iarap haduh katta ia ka NPP ha ka jingpynkhreh ia katei ka elekshon MLA na Mawlai constituency. U la ong ruh ba naduh ba wan pyniasoh u Bah Teibor sha ka party, bun ki kam pynroi ki la poi ha katei ka constituency.
“Tangba ha ka por elekshon bun kiba kam-ei lada leh ia kino kino ki kam, tangba kaba shu kam ei ia ka hok kiwei, ka jingshisha hi kan paw,” u la ong.
Ha kane ka sngi, u Bah Prestone u pynbna ba shen ka Sorkar kan sa phah shna noh ia ka surok kaba donkam tam ha Mawlai kata ka surok na Umjaiur sha Nongpdeng.
