Shillong, Jymmang 19: Ki bor pyniaid District jong ka East Khasi Hills District Administration hynne ka sngi Nyngkong, kila plie paidbah ia ka pre-recruitment camp ba 45 sngi ban ai jinghikai ia ki khun samla kiba don ia ka jingthmu ban rung sha ka kam Indian Army kum ki Agniveers.
Ia kane ka jingai jinghikai la pynlong ha KJP Synod Girls’ Higher Secondary School ha Mawkhar, da ka jingthmu ban pynkhreh bha ia ki candidate ne ki kun samla ba iakhun ia ka Common Entrance Exam kaba la pynbeit ban pynlong ha u bnai Jylliew ne ha ka taiew ba nyngkong u bnai Naitung mynta u snem.
Baroh ki candidate ki don kumba 119 ngut kiba la dep ban register na ka bynta kane ka prokram kiba kynthup naduh ka coaching bad ka physical training. Kito kiba pass ia ka written test kin hap ban leit na ka bynta ka physical fitness training ba 30 sngi.
Ha kane ka sngi bap lie paidbah ia kane ka jingshah ai jinghikai la ia don lang da ki briew jong ka sorkar, ki heh ophisar ka tnad defence ba kynthup naduh Bah C.V.D. Diengdoh, Commissioner and Secretary of the General Administration Department, ka Deputy Commissioner ka kong R.M. Kurbah, u Director ka Army Recruitment Office u Col Vinay Kumar, u Additional Deputy Commissioner u Bah S. Warjri bad u retired Lt Col S. Marbaniang, Zila Sainik Welfare Officer.
Haba kren sha ki khun samla kiba thrang ban rung sha ka kam shiapi, u Bah Cyril Diengdoh u la pynpaw ia ka jingkordor ban rung sha ka kam Indian kum tang kum ka kam hynrei kan dei ruh ka lad ia ki khun samla ba kin long kiba don ia ka burom ka akor bad kumjuh ruh kiba don burom.
Shuh shuh u Bah Diengdoh u la ai mynsiem ia ki candidate ba kin wan tista sha kane ka coaching bad training khnang ba kin lah ban pass ia baroh ar tylli ki exam ba kynthup ia ka Common Entrance Exam bad ka Physical fitness test.
U Col Vinay Kumar haba batai lyngkot sha ki candidate halor ka Agniveer u la sam ruh ia ki mat ba kongsan shaphang kki jingdonkam ban shah jied bad kumjuh ruh ka rukom ban jied ia ki samla bad kumjuh ruh ka jingmyntoi ba kin ioh.
Na kaliang jong ka kong R M Kurbah, kaba dei ka Deputy Commissioner kala kdew ba kane ka jingai jinghikai ba khlem donkam jingsiew ia kane ka free coaching cum training kadei ba la shim khia da ki bor district ban pynbiang ia ki kyrtong ban ioh iaka jingsta bad kumjuh ruh ka sap ban pass ia ka Entrance exams bad ka physical test, kumta kala kyntu ba kidei ban wan tista sha kane ka jingai jinghikai khnangba shi sien ka sngi kin ioh don bynta lang ha ka Indian army.
