Shillong, Jymmang 19: U Myntri Rangbah ka jylla u Conrad K. Sangma hynne ka sngi Nyngkong, ula leit jurip ia ka Shillong Government College of Engineering, kaba la ioh ia ka jingmynjur na ka All India Council for Technical Education (AICTE) ban sdang ia ka Undergraduate Courses ha ka Civil bad Electrical Engineering na ka bynta ka samoi pule u snem 2025-26.
Ha ryngkat ka jingsynran jong ki ophisar na ka tnad pule puthi bad ka Shillong Polytechnic College, u Myntri Ragbah ula jurip ia ka jingtei jong ka Engineering College bad ula lum ia ka jingialang ban iasyllok bad ki nonghikai jong ka college ban sngewthuh ia ki jingdonkam jong ka college.
Ula pynthikna ba ia baroh ki jingpynsnge un sa shimkhia ban leh eiei na ka bynta ban kyntiew ia ki jingdonkam ban pynlong iaka Shillong Government College of Engineering kaban lah ban treikam katkum ka jingbthah jong ka AICTE.
Ki nonghikai jong ka Shillong Polytechnic College kila pynpaw hakhmat u Myntri Rangbah ia ka jingdonkam ban bhah pisa naka bynta ka jingwad bniah ne Research ha ka Science & Technology, ha kaba u Myntri Rangbah ula mynjur ia kane.
Ula ong, kumba long mynta ka Chief Minister’s Research Fellowship (CMRF) ka bei tyngka na ka bynta ki kam wad bniah ha kaba iadei bad ka Arts & Culture ia kaba yn sa pyniar ban kynthup lang ia ki jingwad bniah ha kaba iadei bad ka Science & Technology ruh.
Ka Shillong Government College of Engineering kadei ka Engineering College sorkar kaba nyngkong eh ha ka jylla. Ka Letter of Approval (LoA) kadei kaba la phah sha u Principal Secretary ka tnad pule puthi ha ka 30 tarik u Iaiong. Kane ka jaka pule ka don ha Mawlai Kynton Massar ha East Khasi Hills District bad kadei kaba pyniasoh ne Affiliate bad ka North Eastern Hill University (NEHU).
Ki ar tylli ki Undergraduate Program ki kynthup ia ka Civil Engineering bad Electrical Engineering kin sdang da kaba shim shwa tang 30 ngut ki samla pule na ka bynta ka samoi pule jong u snem 2025-26.
