Aizawl, Nailur 03 : Ka Seng BJP hapoh Mizoram kala shah ktah jur hadien ba u vice-president jong ka Chakma District unit ka BJP ula leit ban pyniasoh ia lade bad ka Seng Congress shwa ka jingpynlong ia ka ilekshon Assembly ha kaba sdang jong u snem u ban wan.
Une u nongialam ka BJP u Dayal Chandra Chakma ula mih noh na ka saffron party hynnin ka sngi Thohdieng ha Kamalanagar, ka headquarter jong ka Chakma Autonomous District Council (CADC).
U Chakma u dei u dkhot barim jong ka District Council (MDC) na Barapansury-I MDC constituency bad u bat ruh kum u Chairman ka CADC ha ka sorbar bala dep jong ka seng Congress.
Ha ka jingialang kaba lyngkot bala pynlong hapoh Congress Bhavan ha Kamalanagar, u nongialam ba la rim uba dei ruh u Chairman ka CADC u B.N Dewan ruh ula pyniasoh sha ka party Congress.
Kumba 56 tylli ki longiing kiba dei na ka BJP bad ka Mizo National Front (MNF) napoh Barapansury-I MDC constituency bad kiba bun kiwei pat ki nongialam ba halor kaba kynthup ia ki dkhot na ki Village Council Members (VCMs) ruh kila pyniasoh sha ka seng Congress ha ryngkat u Chakma.
Ki nongialam ba pawkhmat ka thain kiba la pyniasoh ia lade sha ka Congress ki kynthup ia ka Shanti Moy Chakma, Unit President ka MNF Barapansury-I (East), u Biraj Mohan Chakma, President ka Local Committee ka BJP Barapansury-I (East), u Lokhi Nagar Chakma, President ka Local Committee ka BJP Barapansury-I (West) bad baroh ki dkhot jong ka BJP Village Council Unit ka Boronasury.
“Kam don kano kano ka jingkyrmen na ka bynta ka BJP hapoh CADC namar ki nongialam jong ka ki long ki bym don bor bad ki bym don ia ki lad ki lynti.Ki nongialam ba mynta jong ka BJP hapoh ka CADC ki long kiba leh donbor bad ki ba shah liang, bad namar ka jingbym don ia ki nongialam kiba biang kumta ruh kiba bun na ki nongialam ba kongsan ka party kila iehnoh kam bad kiba bun kiwei pat kin dang iehnoh kam ha kine ki sngi ki ban dang wan,” ong u Dayal Chandra Chakma.
“Nga don ia ka jingsngew skhem hapoh ka jingialam jong u Ramani Chakma, President, Chakma District Congress Committee (CDCC) lem bad kiwei pat ki nongialam bala rim jong ka party Congress bad ba ka sorkar Congress kan wanpai biang ha ka bor ha ka MDC General Election ha CADC bad kumjuh hapoh ka State Assembly Election ha u 2023,” ula ong shuh shuh.
