Shillong, Nailur 03: Ka National Highway and Infrastructure Corporation (NHIDCL) kala dep pyllait ia ki work order jong lai tylli ki song ha ka ban maramot ia ka surok rim jong ka Shillong-Dawki.
Ia kane la pyntip da u Symbud Myntri Rangbah ka Jylla Bah Prestone Tynsong hynnin ka sngi thohdieng haba iakren bad ki nongthoh khubor.
“Ka NHIDCL kala dep pyllait ia lai tylli ki song treikam ba kynthup ia ka surok na Jingkieng Umshyrpi haduh Upper Shillong, Mylliem haduh Pynursla bad na Lower Pynursla haduh Dawki” ula ong.
“Da kane,ka NHIDCL ka kyrmen ban ioh sdang maramot noh ia ka surok Shillong-Dawki naduh mynta u bnai bad ngi kyrmen ruh bad ka jingpyntrei ia ka surok kan ym shah ktah shuh ha u slap” ula bynrap.
Haba kylli ia ka jingmang ban maramot ia ka surok, u Bah Prestone ula ong ba ia mynta hi ym pat ioh jingkhein namar ka Sorkar Jylla kala dep ban aiti ia ka project sha ka NHIDCL bad ka dei ka NHIDCL kaba la khot ia ka tender bad ruh kaba ai ia ki work order.
“Nga lah ban nym don jingtip ia ka jingpynlut ia ka project hynrei nga thikna baka song pisa kan long kat kum ka jingmang bad nga kyrmen baka jingmaramot ia ka surok kan sdang noh shen” ula ong.
