Shillong, Jymmang 10: Kum shi bynta ban pyni iaka jingiatylli, u Lat ka jylla Meghalaya u CH Vijayashankar hynne ka sngi Saitjain ula lum ia baroh ki Nongialam ba ki seng niam bapher bapher ha jylla ban iawanlang da ka mynsiem jong ka jingiatylli bad ka jingiadon ryngkat bad ka Ri.
Ia ka ne ka jingialang la pynlong ha Raj Bhavan, Shillong, ha kaba la sakhi ia ka jingwan iashimbynta jong ki nongmihkhmat na ki niam bapher bapher kiba kynthup ia u Nabha Bhattacharya u Vice President jong ka Meghalaya All Faiths Forum bad President jongka Central Pooja Committee, Shillong, u Rev. Ellizer N Sangma u Pastor jongka Garo Baptist Church, u Rev GPL Gadew na ka Presbyterian Church, Shillong, u Ganesh Dkhar u dkhot jongka Seng Khasi, u Sayidullah Nongrum u President jongka Meghalaya Muslim Forum, u Dr. Shngain Pyrbot u General Secretary jongka Seinraij, Shillong, u Father Staibok Warjri na ka Balang Catholic uba la wan mihkhmat na ka bynta u Archbishop Victor Lyngdohthe, ki nongmihkhmat na ka Balang Presbyterian ka rilum Khasi bad Jaintia Hills, Garo Baptist Church, Ramakrishna Mission bad ka Archdiocese of Shillong.
Ha kane ka jingialang la iashimbynta ruh da u Myntri Rangbah ka jylla Conrad K Sangma ryngkat bad u Symbud Myntri Rangbah ka jylla lyngba ka kor digital online na Delhi.
Haba ai jingkren u Lat ula pynpaw ia ka jingsngewnguh ia ka jingwan iashimbynta wat hapdeng ka jingkhot ha ka por kaba lyngkot bha. Ula pynrem jur ia ki kam lehnoh hapoh India bad ha ka pyrthei baroh kawei bad ula iaroh ia ki nongialam niam don ha syndah bad ka ri.
Ha kane ka khyllipmat kaba sngewkhia, u Lat ula ban jur ia ka kamram kaba kongsan jong baroh ki nongialam niam bad ia ki nongialam ka imlang sahlang ban wanrah ia ka jingiatylli bad ban long kiba jai jai bad ula kyntu ia baroh ki nongshong shnong khlem da khein ia ka niam, kolshor, ba kidei ban ieng tylli ha ka ban batskhem ia ka nongrim ban ia burom markylliang, ka jingieid ri bad ban don ia ka jingiatylli hapoh ka ri.
U Lat ula pynthikna ba baroh ki sienjam la shim na ka bynta ban pynneh ia ka shongsuk shongsain ha ka jylla Meghalaya bad ka jingkhlain jong ka ri India ka shong eh ha ka jingiar bad ka jingkordor jong ka synshar paidbah bad ka khubor jong ka jingsuk ka dei ban synshar ia baroh.
Ha kane ka por jong ka jingtynjuh, ka long kaba kongsan ba baroh ki jaidbynriew kin wanlang kawei ha ka ban iatreilang ban pynthikna ba ia ka jinglong kyrpang kaba iar jong ka imlang sahlang kan long kaba skhem bad kaba khlain.
Ki nongialam niam da kawei ka sur kila kular ban ai ka jingkyrshan kaba pura ia ka sorkar pdeng bad pynpaw ia ka jingkyrmen ba ka jingsuk bad jingshngain kan synshar ha kylleng ki thain. Baroh ki dkhot bad ki ophisar bad u Lat ka jylla kila ai burom ruh ia kito kiba la kyllon iap na ka jingshah thombor da kaba sngap jar ar minit.
Haba ai jingkren, u Chief Secretary Bah Donald Wahlang ula ban jur ia ka jingkongsan ka jingiatylli hapoh ka ri bad ula ong, “Ka ri ka dei kaba wan nyngkong eh”.
Ula ai khublei ruh na ka liang jong ka sorkar ia u Lat ka jylla bad ia baroh kiba la wan ban iashimbynta ha kane ka jingialang.
